– Biz osyndaı bastama kóterdik, biraq eshkimdi mindettemeımiz. Kimge unamdy, kısin. Kıgisi kelmese, mekteptiń bekitilgen formasymen kele beredi. Keıbir otbasylarynyń qoldary qysqa bolýy sebepti ulttyq úlgidegi kıimderdi tiktire almaýy da múmkin. Sonyń bárin eskere kele mindetteýdi artyq kórdik. Biraq bastama ata-analar tarapynan jaqsy qoldaý tapty. Ulttyq kıim kııý oqýshylarǵa ǵana emes, muǵalimderge de, tehnıkalyq qyzmetkerlerge de qatysty, – degen mektep basshysy Dana Baqtybaıqyzy bastama túsinistikpen júzege asyp jatqanyn jetkizdi.
Birneshe synyptardy aralap kórdik. Balalarmen de, muǵalimdermen de pikirlestik.
– Synyp bolyp bárimiz birtústes kıim tiktirýge kelistik. Ata-analarymyz qýana kelisip jatyr. Tiginshi de óz aramyzdan tabyldy. Aıdana Keńbeıilova esimdi apamyzdyń qoly sheber eken. Barlyq balaǵa sol kisi ózi tigip berip jatyr, – deıdi 4 «A» synybynyń jetekshisi Altynaı Bektasova.
Bul sharýa mektep dırektorynyń tárbıe isi jónindegi orynbasary Aınur Baıanbekovanyń tikeleı baqylaýynda kórinedi.
– Bári birden bola qalmaıdy ǵoı. Buryn Naýryz, Táýelsizdik merekesi kezinde qazaqy naqyshta kıinetin bolsaq, endi apta saıyn bir kúndi osylaı belgilep otyrmyz. Múmkin, sóıte-sóıte mektep formasyn ulttyq naqyshqa ózgertermiz. Muny keleshek kórsetedi. Ásirese tómengi synyp oqýshylarynyń qyzyǵýshylyǵy basym ekeni baıqalady, – degen ol ulttyq kıimdi nasıhattaýdan jalyqpaý kerektigin aıtady.
Ǵulama Qanysh atyndaǵy qalanyń batyr Baýkeńniń esimin ıelengen mektep-gımnazııasynyń bul bastamasy barshaǵa juǵysty bolǵaı!
Ulytaý oblysy,
Sátbaev qalasy
