Komıssııaǵa Qazaqstan tarapynan Premer-mınıstrdiń orynbasary Serik Jumanǵarın Qatar tarapynan Saýda jáne ónerkásip mınıstri sheıh Muhammed ben Hamad ben Qasym ál-Tanı teń tóraǵalyq etti.
Qatar saýda jáne ónerkásip mınıstri atap ótkendeı, búginde Halyqaralyq valıýta qorynyń aqparaty boıynsha Qatar bul óńirde damýdyń eń joǵary qarqynyna qol jetkizip, ınvestısııalyq tartymdylyǵy boıynsha álemdik reıtıngte kósh bastap tur.
«Qazaqstanmen qarym-qatynasymyz jaqsy baǵytta damyp keledi, Qatar Ámiri sheıh Tamım ben Hamad ál-Tanıdiń Astanaǵa sapary barysynda birqatar kelisimge qol jetkizildi, bul bizge belgili baǵyttarda ózara is-qımyl jasaýǵa múmkindik beredi. Qazaq ınvestorlaryn bizdiń kásipkerlermen berik áriptestik ornatýǵa shaqyramyn. Men eki el arasyndaǵy taýar aınalymy jańa bıikterge jetetinine senimdimin», dedi sheıh Muhammed ben Hamad ben Qasım ál-Tanı.
О́z kezeginde Serik Jumanǵarın eki memleket arasyndaǵy tyǵyz baılanys ekijaqty qarym-qatynastardyń damýyna oń serpin beretinin basa aıtty. Buǵan joǵary deńgeıdegi turaqty saparlar dálel bola alady.
«Biz Qazaqstannyń halyqaralyq arenadaǵy senimdi ári mańyzdy seriktesi Qatar memleketimen jan-jaqty yntymaqtastyqty tereńdetýge erekshe mán beremiz. Bıyl eki el arasyndaǵy dıplomatııalyq qarym-qatynastyń ornaǵanyna 30 jyl tolady. Osy jyldar ishinde eki el ashyq saıası dıalogke jáne ózara tıimdi saýda-ekonomıkalyq yntymaqtastyqty odan ári nyǵaıtýǵa beıildiligin rastady. Birqatar yntymaqtastyq týraly memorandým júzege asyrylyp keledi, Almaty – Doha arasynda aptasyna 7 reıs qarqyndylyǵymen tikeleı áýe qatynasy ornatyldy. Kelissózder júrgizilip, reıs sanyn 28-ge jetkizý jóninde ýaǵdalastyqqa qol jetkizildi», dedi Premer-mınıstrdiń orynbasary.
Serik Jumanǵarın taraptardyń basqa salalardaǵy ózara is-qımylyn jandandyrýdy usyndy.
«Bizdiń eldiń et jáne basqa da azyq-túlik ónimderin óndirýshiler Qatar naryǵyna taýar eksporttaýǵa qyzyǵýshylyq tanytyp otyr. Osyǵan baılanysty elderimiz arasynda halal sertıfıkattaryn úılestirý rásimderin jedeldetý oryndy dep sanaımyn. Sonymen qatar biz ýyldyryq, balyq, bal, t.b. sııaqty azyq-túlik ónimderiniń premıým segmentin jetkizýge daıynbyz. Sondaı-aq elderimiz arasynda energetıka salasyndaǵy yntymaqtastyqtyń áleýeti zor. Búgingi tańda Qazaqstan gaz óńdeý jáne gaz hımııasyn damytý, sondaı-aq suıytylǵan tabıǵı gaz óndiretin zaýyttar salý arqyly taýarlyq gazdyń resýrstyq bazasyn ulǵaıtý jáne joǵary qosylǵan quny bar ónimder shyǵarý boıynsha eleýli mindetter qoıyp otyr», dedi S.Jumanǵarın.
Úkimetaralyq komıssııanyń 6-otyrysy qorytyndysyna sáıkes taraptar hattamaǵa qol qoıdy, onda ózara ınvestısııalar úshin otandyq jáne qatarlyq bıznes arasyndaǵy baılanystardy jandandyrý nıetin bildirdi. Sondaı-aq aýyl sharýashylyǵy, saýda, tabıǵı resýrstardy paıdalaný men energetıka, kólik, bilim berý, densaýlyq saqtaý, mádenıet, sport, IT jáne kommýnıkasııalar, sondaı-aq áleýmettik-eńbek salasyndaǵy yntymaqtastyq úshin basym baǵyttar sheńberin aıqyndady. Atap aıtqanda, Qazaqstan Respýblıkasy Qatardaǵy qazaqstandyq qyzmetkerlerdiń jumyspen qamtylýyn retteý jónindegi eki el úkimetteri arasyndaǵy kelisimge qol qoıýǵa múddeli ekenin bildirdi. Qujat eńbek kóshi-qony máselelerin jeńildetýge, sondaı-aq qazaqstandyq tarapqa qoljetimdi jáne Qatardaǵy eńbek naryǵynda suranysqa ıe kadr agenttikteri men mamandyqtardyń tizimderimen almasýdy jolǵa qoıýǵa múmkindik beredi.
2023 jylǵy 7 aıdyń qorytyndysy boıynsha Qazaqstan men Qatar arasyndaǵy taýar aınalymy 2 esege artyp, 4,8 mln dollarǵa jetti (2022 jylǵy qańtar-shilde – 2,8 mln dollar). Eksport 0,4 mln dollar, ımport 4,3 mln dollardy qurady. Jalpy, 2005 jyldan bastap 2022 jylǵa deıin 56,6 mln somasyna ınvestısııa tartyldy. Qazir Qazaqstanda 3 qatarlyq kompanııa jumys jasaıdy, onyń ishinde 1 – qarjy sektorynda, 2 – ǵylymı zertteý qyzmetin júzege asyrady.
