Adamnyń adamdyq syn-sıpatyn anyqtaıtyn qadir-qasıetter az emes. Sonyń biri – kóńil-qoshynyń kóterińki, janynyń jaıdary kezin jarqyratyp kórsetetin, syrtqy bet-beınesinen ǵana emes, ishki dúnıesinen de aıqyn habar beretin seziminiń bir sáýleli sáti kúlkisi bolsa kerek.
Kúlkiniń san alýan túri bar... Muny qazaq atamyz baıaǵyda-aq aıtyp qoıǵan! Sol sııaqty onyń bárin óz shyǵarmalarynda keıipkerin beıneleý, bederleý arqyly jiliktep, jiktep kórsetken qalamgerlerimiz de jetedi. Sondaı-aq, syqaqshy aqyn, satırık jazýshylarymyz da ázil-shyny aralas, túrli-túrli kúlkini tizbelep, tizip bergenin bilemiz...
Myna sýrette Dımash atanyń moıynqumdyqtarmen kezdesýiniń bir sáti kórinis tapqan. Úlken kisiniń shyn júrekpen kúlgeni... El basshysynyń keń jaılaýdaı jaıylǵan, kórikti kóldeı kólkigen kóńili... Halqyn súıgen qaıratkerdiń naǵyz qazaqy qalpy...
Sol jaqtan bastasaq, sýrette Jambyl oblystyq partııa komıtetiniń birinshi hatshysy Hasen Bekturǵanov, aýdandyq aýyl sharýashylyǵy basqarmasynyń bastyǵy Qarataı Adambaev jáne soǵys ardageri, sol tustaǵy Fýrmanov atyndaǵy keńshardyń kásipodaq komıtetiniń tóraǵasy Álıhan Esjanov (aq jeıdeli) tur. Al respýblıkadaǵy eń joǵarǵy laýazymdyq qyzmetine qaramastan qarapaıymdylyq pen kishipeıildiliktiń úlgili úrdisimen Dımekeńniń ózi qoltyǵynan ustaǵan aq saqaldy qarııa – Fýrmanov atyndaǵy keńshardyń ozat malshysy Qońqa Ormanbekov.
Kózin kórgenderdiń aıtýynsha, ol kisi ázil-qaljyńdy unatatyn, qýaqy tildi adam eken. Sondyqtan sol shaqta barlyǵyn da qatty kúldiretin sóz aıtqan bolýy kerek...
Berikbaı QADYQOV,
jýrnalıst
Almaty oblysy,
Qarasaı aýdany
