Qaırat Úmbetov oblys basshylyǵynyń óńirdegi Ulttyq ulan áskerimen áriptestik negizdegi qarym-qatynastar ornatqany úshin alǵysyn bildirip, quqyqtyq tártip áskeriniń Bas qolbasshysy, general-leıtenant Erkin Botaqanovtyń sapar barysyna qoıǵan tapsyrmalary jáne mańyzdy respýblıkalyq is-sharaǵa qatysty josparlarymen tanystyrdy. Sondaı-aq Ulttyq ulan bas qolbasshysynyń buıryǵymen Batys Qazaqstan oblysy ákiminiń orynbasary Baqytjan Narymbetovti «Quqyqtyq tártip áskerine 30 jyl» merekelik medalimen marapattady. Eki tarap osyǵan deıin qol jetkizilgen dostyq negizdegi áriptestik qarym-qatynastardy ári qaraı da jalǵastyrýǵa kelisti.
Dál osyndaı merekelik medalmen Oral garnızony boıynsha áskerı prokýror, ádilet podpolkovnıgi Marat Butymbaev ta marapattaldy. Qaırat Úmbetov sapar aıasynda qyzmetke jańa taǵaıyndalǵan áskerı prokýrormen kezdesý ótkizdi. Qos tarap óńirdegi quqyqtyq tártip pen áskerı ortadaǵy zańdylyq týraly pikirlesti. Ádilet podpolkovnıgi Marat Butymbaev Ulttyq ulan áskerı bólimderimen jumys barysy týraly áńgimelese kele, prokýratýra qyzmetkerleriniń áskerı ortada zań men tártipti nyǵaıtý boıynsha ár kez qoldaý kórsetetinin jetkizdi.
– Ulttyq ulan – quqyqtyq tártip áskeri. О́z qyzmetinde árqashan zańdylyqty saqtaý qaǵıdalaryn basshylyqqa alady. Elimizde tynyshtyq pen turaqtylyqty qamtamasyz etý, qorǵanys qabiletin nyǵaıtý – bizdiń ortaq mindetterimiz. Búgingi marapatyńyz osy mindetti birge júzege asyrýǵa óz septigin tıgizetinine senimdimin, – dedi general-maıor Qaırat Úmbetov marapatty tapsyrý barysynda.
Sapar barysynda Halyq qaharmany Oral qalasynyń qurmetti aqsaqaly, Ekinshi dúnıejúzilik soǵys ardageri Venıamın Skolenkomen de kezdesti. Ulttyq ulannyń áskerı orkestri ardagerdiń aýlasyna kelip, soǵys jáne patrıottyq taqyryptaǵy shyǵarmalardy oryndady. General-maıor ardagerdiń aldynda quttyqtaý sóz sóılep, baǵaly syılyqtardy tapsyrdy.
«Ulttyq ulan – áskeri jaýyngerlik dástúrdi berik ustanǵan ásker túri. Biz ardagerlerimizge ár kez qurmet kórsetýge, sizder syılaǵan beıbit kúnderdi saqtaýǵa, elimizdi qorǵaýǵa daıynbyz», degen ol Ulttyq ulan bas qolbasshysynyń quttyqtaý hatyn oqyp berdi.
Ardager kórsetilgen qurmetke alǵysyn aıtyp, halyqty birlik pen dostyqqa shaqyrdy. El qorǵaýynda júrgen azamattarǵa zor densaýlyq tiledi. Kezdesý Ulttyq ulannyń 5517 áskerı bóliminiń áskerı orkestriniń súıemeldeýimen oryndalǵan shaǵyn konsertke ulasty.
Darıǵa QURMANALY,
L.N.Gýmılev atyndaǵy Eýrazııa ulttyq ýnıversıtetiniń stýdenti
