Apellıasııalyq alqa Ýálıhan Jánibekov pen Dinmuhamed Isaevqa qatysty qylmystyq ister boıynsha Shymkent qalalyq aýdanaralyq sotynyń úkimin ózgertti.
«Sot alqasy Qylmystyq kodekstiń 146-baby 3-bóligi boıynsha sottalǵan Jánibekovtiń áreketterin 146-bap 2-bólik 1-tarmaqqa aýystyrdy. Oǵan quqyq qorǵaý organdarynda 3 jyl merzimge qyzmet atqarý quqyǵynan aıyra otyryp 3 jyl, 6 aı bas bostandyǵynan aıyrý jazasy taǵaıyndaldy», delingen Shymkent soty baspasóz qyzmetiniń málimetinde.
Al buǵan deıin sot sheshimi basqa bolǵan edi. Ol kezde sot Jánibekovti 7 jylǵa bas bostandyǵynan aıyrǵan bolatyn. Qarataý aýdandyq polısııa bóliminiń bastyǵy Dinmuhamed Isaevty birinshi satydaǵy sot úsh jylǵa jáne alty aıǵa qamaýǵa alyp, polısııa podpolkovnıgi ataǵynan aıyrǵan edi. Endi ol kinásiz dep tanylyp, onyń áreketterinde atalǵan qylmystyq quqyq buzýshylyq quramynyń bolmaýyna baılanysty aqtalyp otyr.
Eske salaıyq, osy jyly maýsymda Nurbolat Jumabaevtyń Polısııa departamenti ǵımaratynda óli tabylýyna baılanysty quqyq qorǵaý organdarynyń qyzmetkerleri bas bostandyǵynan aıyrylǵan edi. Jumabaev pen onyń dosy Sergeı Petrovty polısııa 2021 jyly jeltoqsanda avtokólik urlaý isi boıynsha ustaǵan bolatyn. Keıinirek birneshe jaýap alýdan keıin Nurbolat Jumabaevtyń júregi toqtap qalǵan. Bastapqyda polısııadaǵylar tergeý kezinde er adam ózin nashar sezinip, jedel járdem kelgenshe qaıtys bolyp ketkenin jetkizgen. Biraq marqumnyń týystary er adamnyń denesinde jaraqattar bolǵanyn aıtypty. Budan soń quqyq qorǵaý organdary qyzmettik tekseris júrgizdi. Sóıtip atalǵan is boıynsha tórt qyzmetkerdiń kúsh qoldanyp, azaptaǵany belgili boldy.
