«Atameken» óner ordasynda eki apta turatyn kórmeniń maqsaty – eki oblys sýretshilerin mádenı jáne rýhanı baılanystyryp, ózara shyǵarmashylyq tájirıbe almasýǵa múmkindik jasaý, Qyzylorda oblysy sýretshileriniń týyndylaryn Oral halqyna kórsetý. Kórmede Ábilhan Qasteev, Olga Kýjelenko, V.Kýzenkov, Gúlfaırýz Ismaılova syndy qazaq ulttyq sýret óneri klassıkteriniń shyǵarmalarynan bastap, otandyq jańa baǵyt ókilderi Salıhıtdın Aıtbaev, Ábilqasym Sársenbaev, Shákirbek Samenov, Iаsbı Aǵytaev, Amankeldi Kenenbaev, Ábdilda Abyzbekov, Jańabergen Osymbetov, О́rken Mamaqova, t.b. tanymal óner ıeleriniń barlyǵy 73 týyndysy qoıyldy.
Kórmeniń ashylý saltanatynda Batys Qazaqstan oblysynyń mádenıet, tilderdi damytý jáne arhıv isi basqarmasy basshysynyń orynbasary Qýanyshbek Muhanǵalıev sóz sóılep, Syr elinen rýhanı-mádenı isti bastap kelgen qonaqtarǵa Aqjaıyq jurtynyń atynan alǵys bildirdi. Al Qyzylorda oblystyq tarıhı-ólketaný mýzeıiniń dırektory Sapar Kózeıbaev qonaqjaılyq tanytqan «Atameken» óner ordasynyń dırektory Baýyrjan Halıollaǵa rızashylyq bildirip, kórkemsýret qoryna kartına syıǵa tartty.
«Qazirgi tańda S.Aıtbaev atyndaǵy kórkemsýret galereıasynyń qorynda 800-ge jýyq qundy týyndy bar. Biz Oralǵa joǵaryda aty atalǵan óner ıeleriniń shyǵarmasynan bólek, galereıa qoryndaǵy ózbekstandyq sýretshi Dılorom Mamedovanyń pastozdyq tehnıkada oryndalǵan «Aral mańyndaǵy aýyl» kartınasy men qyrǵyz sýretshisi Ýrmat Sereńovtiń «Qorqyt týraly ańyz» kartınasyn ákeldik. Syr eliniń tarıhyn shyǵarmashylyǵyna arqaý etken Temirbek Saǵymbaev, Nurken Qalymbetov, Ulmeken Maýytova, Dáýletbek Toıshybaevtyń jumystary da kórermendi beıjaı qaldyrmas degen oıdamyz», deıdi Sapar Álıasqaruly.
Batys Qazaqstan oblysy
