– Bizge Almatydaǵy ortalyq qoımadan keletin kúrish baǵasy 520 teńge bolsa, «Baıqońyr» ÁKK arqyly jetkiziletin kúrish quny 400 teńge. Biz osy ónimdi kóbirek alǵymyz keledi. Áleýmettik mańyzy bar azyq-túlik taýarlary baǵasyn aldyn ala usynyspen bekitilgen qunnan kótermeımiz. Alda dúken arqyly undy da osyndaı baǵamen saýdalaýdyń jaıyn «Baıqońyr» ÁKK ókilderimen aqyldasyp otyrmyz. Reti kelse, aldaǵy ýaqytta ónimderdi ózimizden alyp, saýdaǵa shyǵarǵymyz keledi, – deıdi saýda jelisiniń ókili Erkejan Tursynbaı.
Saýda jelisi qazir sıyr men taýyq etin kórshi oblystardan aldyryp otyr. Aımaqtaǵy azyq-túlik taýarlaryna baǵa belgileý tizbegindegi deldaldyq shemalardy tekserý komıssııasy ókilderi jaqynda ǵana ashylǵan Qarmaqshydaǵy qus fabrıkasy alǵashqy ónimin shyǵarýǵa daıyn ekendigin aıtady. Alystan arbalaǵansha, jaqynnan dorbalaý jergilikti saýda oryndary úshin de tıimdi.
«Qyzylorda» saýda jelisin de aralap, ondaǵy baǵalardy saraptaǵan komıssııa otyrysty endi aptasyna 2 márte ótkizip turatyn boldy. Jyl basynda oblys ákimi ókimimen qurylǵan komıssııanyń 91 otyrysy ótkizilip, pııaz, tuz ben kúrish baǵalaryn jónsiz qymbattaýdyń 11 deregin anyqtapty.
Kúrish baǵasyna baılanysty 6 kásiporynǵa Qyzylorda oblysy boıynsha básekelestikti qorǵaý jáne damytý departamenti aıyppul salsa, bes derek boıynsha baǵa tómendetilip, Saýda jáne tutynýshylardyń quqyǵyn qorǵaý departamenti negizsiz deldaldardy qysqartypty. Baǵanyń ósýin tejep, ınflıasııalyq qysymdy tómendetý maqsatynda oblystaǵy 183 saýda nysanymen saýda ústemesin 10 paıyzdan asyrmaý týraly ekijaqty memorandýmdar jasalypty.
Saýda nysandarynyń ókilderimen kezdesýde oblys ákiminiń birinshi orynbasary Serik Qojanııazov jańa jyl qarsańyndaǵy qarbalasty paıdalanyp dúkender áleýmettik mańyzy bar azyq-túlik baǵasyn qymbattatýǵa bolmaıtynyn qatań eskertti.
Osy kúni oblystaǵy turaqtandyrý qorynda 2092,5 tonna ónim men 291,6 myń dana jumyrtqa bar. Oblys turǵyndaryn 5901,5 tonna áleýmettik mańyzy bar azyq-túlik taýarymen qamtamasyz etý baǵytynda 11 kásipkerlik sýbektisine mindetteme belgilengen. Bıylǵy kúzgi ónimnen 4 952 tonna kókóniske forvardtyq kelisim jasalyp, búginde onyń 1032 tonnasy turaqtandyrý qoryna jetkizilip, arzan baǵada áleýmettik dúkender men saýda úılerinde satylymǵa shyǵaryla bastady.
Áleýmettik nan baǵasyn turaqtandyrý úshin jyl basynan beri 7 480 tonna un satyp alynyp, oblystaǵy naýbaıhanalarǵa taratylyp keledi. Bul óńirde áleýmettik nan baǵasyn 90 teńge kóleminde turaqty ustaýǵa múmkindik berip otyr.
Jyl basynda 571 myń dana taýyq jumyrtqasy satyp alynyp, oblysta osy ónim baǵasy turaqtalyp tur. Osy kúni óńirlik turaqtandyrý qoryna taǵy da 500 myń jumyrtqa satyp alý jóninde «Baıqońyr» ÁKK» AQ men «Aqkól qus» JShS-nyń resmı dıstrıbıýteri «Bereke Treıd KZ» JShS arasynda kelisim shart jasalyp, áleýmettik dúkenderde 43 teńgeden saýdalanyp jatyr.
Jyl basynan aýyl sharýashylyǵy ónimderin arzan baǵada saýdalaǵan 271 jármeńke uıymdastyrylyp, oblys turǵyndaryna 10,3 myń tonna ónim usynyldy.
Jergilikti bılik ókilderi aýyl turǵyndarynyń baý-baqsha egýine jaǵdaı jasap, jerin daıyndap, sýyn jetkizip berýdiń arqasynda qazir elde óz-ózin qamtamasyz etkender qatary kóbeıgenin aıtady. Bul tájirıbe alda da jalǵasady.
Aptasyna eki ret ótetin komıssııa otyrysynda aımaqtaǵy azyq-túlik taýarlaryna baǵa belgileý tizbegindegi deldaldyq shemalardy tekserý nátıjeleri talqylanyp otyrady.
Bastysy – negizsiz deldal tyıylsa, baǵa aıyly jıylady.
Qyzylorda
