О́tken aptadan beri óńirde stasıonarda 64 naýqas emdelip jatyr. Al qyzylshadan emdelgen ambýlatorlyq naýqastardyń jalpy sany 72-ge jetken.
– Aýyrǵandardyń 65 paıyzy – balalar. Sonyń ishinde altaýy – 1 jasqa tolmaǵan sábı. 10 aılyq bir balanyń jaǵdaıy aýyr, jan saqtaý bóliminde jatyr, – deıdi oblystyq densaýlyq saqtaý basqarmasy basshysynyń orynbasary Aınash Ǵubaıdýllına.
Mamandardyń aıtýynsha, naýqastardyń kópshiligi – qyzylshaǵa qarsy ekpe almaǵandar. Oblysta qazir 282 qyzylsha oshaǵy anyqtalyp, naýqaspen baılanysta bolǵan 1 942 adam baqylaýǵa alynǵan. Jaǵdaıdy saýyqtyrý úshin 6 aılyqtan asqan balalardy qosymsha jappaı ımmýndaý, ıaǵnı ekpe jasaý bastaldy. Sońǵy 29 kún ishinde óńirde 2 005 bala ekpe qabyldaǵan.
– Qazir qosymsha ekpe alý júrip jatyr. О́ńirde jalpy sany 50 myń adam egilýi kerek, – deıdi oblystyq sanıtarlyq-epıdemııalyq baqylaý departamenti basshysy Muhamǵalı Aryspaev.
Mamandar túrli sebeppen ekpe alýdan bas tartqandar osy aýrýdy ári ózderi juqtyryp, ári taratyp otyrǵanyn aıtyp, dabyl qaǵyp jatyr. О́ńirde osyndaı bas tartýshylardyń sany 4 676 adam bolǵan. Sońǵy úgit-nasıhat jumysynyń nátıjesinde 813 adam ekpe alǵan. Alaıda áli de 3 862 adam ekpeden bas tartyp otyr eken. Olardyń ishinde 34 paıyzy ekpege dinı sebeppen qarsy bolsa, 16 paıyzy vaksınaǵa senimsizdik bildirgen.
Batys Qazaqstan oblysy
