Marqumnyń jaqyn týysy, Pavlodar qalasynyń burynǵy ákimi Qaırat Núkenovtiń aıtýynsha, Qýandyq Bıshimbaev úılener aldynda Saltanat Núkenovaǵa «tek meshitke baryp neke qıdyramyz» dep shart qoıǵan.
«Kóremiz» baǵdarlamasyna qonaq bolǵan burynǵy sheneýnik qaryndasyna qatysty sol kezdegi ahýaldy baıandap berdi. Saltanat bir kúni Pavlodardaǵy shańyraǵyna erekshe tolqynyspen barǵan.
"О́mirlik mahabbatyn tapqanyn aıtty. Jastar bir-birin kezdestirgen soń, eki jarty - bir bútin bolýdy qalaǵannan keıin ata-anasy qarsylyq tanytpady. Biraq Bıshimbaevtyń «zańdy nekege turmaımyz, tek meshitke baryp neke qıdyramyz» degen bir sharty boldy. Qazirgi zaman sondaı, esh qarsy bolmadyq, ekeýi solaı kelisken eken. Sondyqtan ata-anasy men bizdiń taraptan eshqandaı suraq týyndamady", - deıdi ol.
Alaıda, marqumnyń úı ishi ol kezde Qýandyq Bıshimbaevtyń eki ret otbasyn qurǵanyn bilmegen. Olar bul Bıshimbaevtyń ekinshi nekesi dep túsingen.
"Biraq buryn eki nekede bolǵanyn, úshinshi ret úıleneıin dep jatqanyn bilmedik. Ekinshi jary Nazymdy tek BAQ betterinen tanıtynbyz. Bıshimbaev Nazymmen zańdy túrde ajyrasqandyqtan, qaryndasymyzdyń bolashaq jarymen bas qosyp, birge turýyna ata-anasy esh alańdamaı, óz batalaryn berdi. Birinshi ret kórgende syrt kózge baqytty jup sekildi kórindi. Iá, Bıshimbaevtyń buǵan deıin sottalǵanyn, túrmede otyryp shyqqanyn bildik. Biraq ol bizge shyqqan soń meıirimdi, aqjarqyn bolyp kórindi", - dedi ol.
