Bekzat óner meıramyna Mádenıet jáne aqparat mınıstri Aıda Balaeva, Reseı Federasııasy Mádenıet mınıstriniń orynbasary Andreı Malyshev, Reseıdiń Qazaqstandaǵy Tótenshe jáne ókiletti elshisi Alekseı Borodavkın, sondaı-aq Qazaqstan men Reseıdiń eńbek sińirgen ártisteri qatysty.
– Osy jyldyń 2 naýryzynda elimizdiń mádenı ıgiligi bolyp sanalatyn Qazaqstannyń jetekshi teatry «Astana Opera» Memlekettik opera jáne balet teatrynyń sahnasynda ótken ǵasyrdyń uly ımpresarıosy, orys mádenıetin damytýǵa jáne tanymal etýge zor úles qosqan, negizin qalaýshysy Sergeı Dıagılevtiń «Orys maýsymdary» aýqymdy halyqaralyq mádenı jobasy bastalǵan edi. Jyl boıy reseılik áriptesterimiz otandastarymyzdyń júreginde óshpes áser qaldyrǵan mádenı is-sharalar keshenin usyndy. Atap aıtsaq, Sankt-Peterbýrg memlekettik akademııalyq balet teatry Borıs Eıfmannyń gastrolderi, aty ańyzǵa aınalǵan maestro Iýrıı Bashmettiń jetekshiligimen Búkilreseılik jasóspirimder orkestriniń konserti, A.Chehov atyndaǵy Máskeý Kórkem teatrynyń gastrolderi, Sankt-Peterbýrg óner akademııasynyń «Beıneleý óneri» kórmesi, sansyz sheberlik synyptary, Reseı teatr óneri ınstıtýtynyń dıplomdyq qoıylymdarynyń kórsetilimi jáne taǵy basqalary. Sondaı-aq 13 jeltoqsanda «Qazaqkonsert» sahnasynda S.Zverev atyndaǵy Saha Respýblıkasynyń «Kyyl Ýola» ulttyq bı teatry óz ónerin usynady. Munyń bári – eki el arasyndaǵy berik dostyq qarym-qatynastyń kepili, – degen Mádenıet jáne aqparat mınıstri ónerdiń ártúrli mádenı toptardy baılanystyryp, mádenıetaralyq dıalog pen ózara túsinistiktiń damýyna yqpal etetin kópir ekendigin atap ótti. A.Balaevanyń aıtýynsha, kelesi jyly Qazaqstanda belgili mádenıet jáne óner qaıratkerleriniń, sondaı-aq TMD, Grýzııa, Baltyq elderiniń halyqaralyq teatr forýmdary, «Intervıdensııa» televızııalyq jobasy, Ortalyq Azııa elderiniń halyqaralyq teatr festıvali, «Operalia» opera jáne balet óneri festıvali sııaqty Reseıdiń jetekshi shyǵarmashylyq ujymdarynyń qatysýymen birqatar mádenı is-shara josparlanǵan.
– Búgin «Orys maýsymdarynyń» saltanatty jabylýy aıasynda mýzykalyq ónerdi súıetinder men kásibı mamandarǵa arnalǵan «Eki astana dýeti» gala-konsertin Dmıtrıı Bertmannyń «Gelıkon-opera» Máskeý mýzykalyq teatry «Astana Opera» memlekettik opera jáne balet teatrynyń ujymymen birlesip, Valerıı Kırıanov pen Rýslan Baımýrzın syndy eki tamasha dırıjerdiń jetekshiligimen uıymdastyrdy. Bul keshtiń máni aıryqsha. О́ıtkeni mýzykalyq óner – boıymyzdaǵy eń názik jáne bıik sezimderdi oıatatyn, asyl úmitter men umtylystarǵa shaqyratyn úlken kúsh, – dep atap ótti Aıda Ǵalymqyzy.
«Orys maýsymdary» Qazaqstanda naýryz aıynda KSRO halyq ártisi Iýrıı Bashmettiń jetekshiligimen Búkilreseılik jastar sımfonııalyq orkestriniń «Chaıkovskıı-gala» baǵdarlamasymen ashylǵan bolatyn. Bir jylǵa sozylǵan óner dýmany «Qos astana dýeti» konsertimen túıindeldi. Konsertke qos dırıjer – «Gelıkon-operanyń» bas dırıjeri, Máskeý syılyǵynyń laýreaty Valerıı Kırıanov pen «Astana Opera» teatrynyń dırıjeri Rýslan Baımýrzın jetekshilik etti.
Elordadaǵy teatr sahnasynda Qazaqstannyń eńbek sińirgen qaıratkerleri Jupar Ǵabdýllına, Saltanat Ahmetova, Azamat Jyltyrkózov, Medet Shotabaev, sondaı-aq Reseıden kelgen halyqaralyq baıqaýlardyń laýreattary Iýlııa Sherbakova, Valentına Gofer, Shota Chıbırov, Maksım Perebeınos óner kórsetti.
Chaıkovskıı, Verdı, Rossını, Dargomyjskıı, Bıze, Pýchchını, Offenbah operalarynan otandyq jáne sheteldik juldyzdardyń dýetteri oryndaldy. Sondaı-aq jurtshylyq nazaryna A.Jubanovtyń «Abaı» operasynan Abaıdyń arııasy, L.Hamıdı men M.Tólebaevtyń «Birjan-Sara» operasynan dýet pen hor jáne t.b. usynyldy. Gelıkondyqtar alǵash ret qazaq tilinde án shyrqady.
«Máskeý men Astananyń shırek ǵasyr boıy yntymaǵy jarasyp keledi. Al «Gelıkon-opera» men «Astana Operany» tek jumys emes, dostyq qarym-qatynas ta baılanystyrady. Ártisterimizdiń «Orys maýsymdary» jobasyna qatysqanyna sheksiz qýanyshtymyn. Bul joba Astana turǵyndaryna degen sheksiz mahabbatymyzdy jetkizýge múmkindik berdi. Sol súıispenshiligimizdiń belgisi dep qabyldasańyzdar da bolady, ózderińiz kýá bolǵandaı, gelıkondyqtar alǵash ret qazaq tilinde án shyrqady. Qazaq tili óte áýezdi bolǵanymen, qıyn til eken. Ánderdi jattaýda biraz qınaldyq. Biraq nátıjesi kóńilimizdi marqaıtty. Kórermenniń de kóńilinen shyqty degen senimdemiz», dedi teatrdyń bas dırektory ári kórkemdik jetekshisi, Reseıdiń halyq ártisi Dmıtrıı Bertman.
Sonymen qatar aıtýly óner festıvali aıasynda «Astana Opera» teatrynda «Art-maskarad» atty teatrlyq kıimderdiń eksklıýzıvti kórmesi uıymdastyryldy. Ataqty Aleksandr Golovın, Lev Bakst, Mıhaıl Larıonov jáne Sergeı Sýdeıkınniń júzjyldyq tarıhy bar eskızderi boıynsha tigilgen kostıýmder jurtshylyq nazaryna usynyldy.
