Granttar jańa ıdeıalar men bastamalardy iske asyrýǵa umtylǵan el azamattaryna beriledi. Úmitkerlerdiń jobalary ǵylym, mádenıet, aqparattyq tehnologııalar, bıznes, medıa baǵyttary boıynsha irikteledi. Bıyl konkýrsqa 3 myńnan astam ótinish túsken. Saltanatty is-sharada Aıda Balaeva jeńimpazdardy arnaıy quttyqtap, 3 mıllıon teńgelik grant syılyǵyn tabystady.
«Biz úlken ózgerister dáýirinde ómir súrýdemiz. Jastarǵa durys tańdaý jasaý, senimge laıyq azamat bolý, ózin ózi damytý, oqý jáne eńbek arqyly tabysqa umtylý sııaqty eń mańyzdy jaýapkershilik júktelgen. Memleket basshysy Qasym-Jomart Toqaev jastardyń damýyna, olarǵa jańa jáne aýqymdy múmkindikter ashýǵa erekshe kóńil bóledi. Bar úmitimiz – eńbek pen bilimniń jolymen júretin, adamdyq qadir-qasıettiń mánin tereń túsinetin, ata-baba dástúrin qasterleıtin jastarda. Búgingi berilgen grant – tabandylyqtaryńyz ben talanttaryńyzdyń, qajyrly eńbekterińiz ben adaldyqtaryńyzdyń, qoǵam úshin mańyzdylyq pen óz áleýetińizdi moıyndaýyńyzdyń syıy. Bul qurmet odan ári damý men yntalanýǵa jetelesin. Árbir qadamdaryńyz jańa jetistikter men jańalyqtarǵa jol ashyp, shyǵarmashylyq, ǵylymı, iskerlik ıdeıalaryńyz elimizdiń damýyna eleýli úles qosýǵa múmkindik bersin. Sizder Qazaqstandy budan da zor kórkeıtetinderińizge senemin!», dedi Mádenıet jáne aqparat mınıstri.
Úzdikter qatarynda Qazaqstannyń mádenı murasyn nasıhattaýǵa, halyqtyq mádenı dástúrler men ónerdi ilgeriletýge, IT salasyndaǵy ǵylymı zertteýlerdi, startaptar men jobalardy, ekonomıkanyń negizgi sektorlaryndaǵy kreatıvti bıznes ıdeıalardy iske asyrýǵa baǵyttalǵan jobalar bar. Atap aıtsaq, «Ǵylym» baǵytynda Danagúl Bekjanova, Araılym Serikbaı, Erkebulan Raıymbekov, Gúlzat Qaıranova, Máýlen Bekturǵanov, Jámılá Erkebaeva, «Mádenıet» salasynda Adel Abdrahmanova, Aınýra Polatova, Araı Dosmuhambetova, Ekaterına Hýdıakova, Raýshan Kımran, Araılym Qadyr, «Aqparattyq tehnologııalar» boıynsha Baqytjan Sarıev, Sanııa Ábildınova, Qanat Tájihan, Arǵyn Saǵash, Nurlan Bıimbet, Alýa Súleımenovanyń jobalary grantqa laıyq boldy.
Al «Bıznes» baǵytynda jeńimpaz bolǵandar – Behrýz Aımetov, Dáýren Bekseıtov, Gúlsara Bóltekova, Arsena Kýshjanova, Iаroslava Pılıpýshko, Anastasııa Kravchenko. Sondaı-aq «Medıa» salasynda jobalary úzdik shyqqandar – Almas Maratuly, Álıman Áýeshanova, Islam Sharap, Jupar Dúısekova, Erlan Eralıev, Shalqar Sattarov.
Aıta keteıik, Memleket basshysy 2021 jyly «Táýelsizdik urpaqtary» grantyn jas otandastarymyzdyń jańa jáne qoldanystaǵy bastamalaryn qoldaý maqsatynda taǵaıyndaǵan edi. Grant aıasynda 63 adam óz jobasyn Qazaqstanda ǵana emes, shetelde de túrli salalarda tabysty júzege asyryp jatyr.
Oǵan qosa elimizde jastardy qoldaý baǵytynda 1992 jyldan bastap dástúrli túrde ǵylymı, shyǵarmashylyq, kreatıvti qyzmetpen aınalysatyn, sondaı-aq sport salasynda jetistikteri bar azamattarǵa «Daryn» memlekettik jastar syılyǵy beriledi. Sonymen qatar jazýshylar men aqyndarǵa arnalǵan Prezıdenttik arnaýly ádebı syılyq, daryndy ǵalymdar D.A.Qonaev atyndaǵy syılyqtar men ǵylymı stıpendııalar alady.
