Jarqyn jol

Ulttyq kitaphana qabyr­ǵasyna zııaly qaýymdy jına­ǵan taǵylymdy eńbektiń tanys­tyrylymyna Zulqııa Muqan­qyzynyń ózi qatysty. Qazaq tele­vızııasynyń bastaýynda tur­ǵan onyń shyǵarmashylyǵy men eńbek jolyndaǵy erekshe sátteri qamtylǵan kitap alty taraýdan turady.

«Kózińnen uqtym bir syrdy» dep atalǵan alǵashqy taraý­da Zul­qııa Jumatovanyń ár jyldary baspasóz betinde jaryq kórgen túrli taqyryptaǵy óleń­deri toptastyrylǵan. Al «О́mir jyry» atty ekinshi taraý­da avtordyń áńgime, maqala, ocherk­teri qamtylsa, kelesi taraýda Z.Jumatovanyń jumystaǵy qyzyqty sátteri, habar daıyndaý barysyndaǵy erekshelikteri, ortasymen qarym-qatynasy týraly televızııa salasynyń ardagerleri L.Seıitov, Q.Igisinov, N.Ahmetovalardyń estelikteri jınaqtalǵan.

Tórtinshi taraý «Esten ketpes sol bir kez» dep atalypty. Munda dıktordyń ju­­mys barysynan, áriptesterimen birge ót­kizgen shýaqty sátterinen fotoshe­jire,  Z.Jumatovanyń BAQ betterinde ja­rııa­lanǵan suhbattary engen. Kitaptyń «О́mir tolqyndary» bólimi taǵylymdy tulǵanyń rýhanı bastaýy, ósken ortasy, ata-ana, ba­ýyrlary, urpaǵy týraly syr shertedi.

«Qara shańyraqqa qaıta oralý» dep atalǵan qorytyndy taraýda Z.Jumatovanyń qazaq televızııasynyń 50, 55, 60, 65 jyldyq mereıtoılyq is-sharalaryna qatysýy, 100 jyldyq mereıtoıynyń qara shańyraqta atalyp ótýi, jyly lebizderi, estelikteri, áriptesterdiń ystyq yqylasy men qoshemeti, estelik sýretter men kórermenderge bergen batasy toptastyrylǵan.

Televızııa qarlyǵashynyń ómir ótkel­derinen habar beretin jınaqty ulttyq arna qabyrǵasyndaǵy izbasar shákirtteri jekelegen demeýshilerdiń qoldaýymen jaryq­qa shyǵarǵan. Igi iske muryndyq bolǵan belgili telejýrnalıst, Aqparat salasynyń úzdigi Sáýle Jırenshına Z.Jumatovanyń televızııadaǵy jarqyn joly keıingi býynǵa úlgi-ónege ekenin aıtady.

«Zulqııa Muqanqyzynyń álemine engen saıyn qazaq áıeliniń ótken ǵasyrda erkin kósilip shyǵarmashylyqpen aınalysqa­nyn kórdim, óleń jazyp, júregin terbegen ­syrlaryn jasyrmaı jaryqqa shyǵarǵa­nyn, áńgimelerinen sol qoǵamnyń tyny­syn aıshyqtaǵan, óz pikirin erkin jetkize bil­gen, júregin mazalaǵan oılardy búkpegen syr­shyl jannyń beınesin tanı túsemiz. Ashar­shylyq pen soǵystyń, jetimdik pen jesirliktiń zary súıekten batpandap ótken XX ǵasyrdaǵy qazaq áıeliniń asyl armany, muń-zary Zulqııa apaımen XXI ǵasyrǵa ilesip kelgendeı. Osynsha júk názik áıel janyn qalaı ezip jibermegen? Ol júregindegi máńgi óshpes mahabbatpen, Jaratýshyǵa shúkirligimen, salqar sabyrymen búgingi kúnge jetip otyr», deıdi Sáýle Jırenshına.

Aıtýly is-sharada L.Seıitov, Q.Igisi­nov, Z.Elǵondıeva, Á.Kópish qatarly te­le­vı­­­zııa ardagerleri avtordyń kásibı she­berligi, qıyn­dyqqa toly taǵdyr joly tý­raly áserli áńgime aıtsa, Q.Sársenbaı, M.Ahetov, B.Múrsálim, t.b. izbasarlary esi­­mi tuń­ǵysh dıktor retinde tarıhqa engen tul­­­ǵa­ǵa qurmet kórsetý keıingi býynnyń bo­ryshy ekenin jetkizdi.

Ǵasyr ǵumyr keıýananyń qaıratyn alsa da, kóńil kógindegi sezim sáýlesine sel­keý túsire almapty. Jan dúnıesi altyn sandyqtaı abyz keýde kórgeni men túıgenin shejiredeı shertedi. Eńbegin elep, syı-qur­met kórsetken izbasarlaryna alǵysyn aıtqan Zulqııa Muqanqyzy kópshilikke batasyn berdi.

«Eń aldymen adam balasynyń jany sulý bolýy kerek. Jannyń sulýlyǵy degen – ishki tazalyq, jaqsy minez. Jan bala­syn jatyrqamaı, jan dúnıesine úńilseń, ár adamnyń jaqsy qasıeti bolady. Oıy taza adamnyń ózi taza, ózi taza kisiniń sózi taza. Adal eńbek etip, kópshilikti qur­met­teńder. Adamdyqtan bıik ataq joq. Jańa Qazaqstanymyzdyń kóshin alǵa súıregen azamattarǵa Alla qýat ber­sin», deıdi ǵasyr ǵumyr ıesi.

ALMATY