Respýblıkanyń túkpir-túkpirinen jınalǵan oqýshylardy Prezıdent Qasym-Jomart Toqaevtyń atynan quttyqtaǵan Oqý-aǵartý mınıstri Ǵanı Beısembaev: «Bizdiń maqsatymyz – elimizdegi balalardyń júzinen kúlki ketpeýin, baqytty balalyq shaǵyn qamtamasyz etý. Búgingi mereke árbir balanyń kóńiline úlken qýanysh pen úmit syılaýy kerek. Merekelik is-sharaǵa arnaıy erekshe toptaǵy, kópbalaly, ınklıýzıvti toptaǵy, erekshe bilimdi qajet etetin balalar keldi. Prezıdent shyrshasy – jyl saıynǵy dástúrli mereke. Ár óńirden aldyńǵy qatarly balalar kelip otyrady. Budan bólek, dál osyndaı tizimdegi balalar óńirlerde ákimderdiń qatysýymen uıymdastyrylǵan Prezıdent shyrshasyna da shaqyryldy», dedi. Budan keıin mınıstr Prezıdenttiń atynan ár balaǵa quttyqtaý hattary men syılyqtar tabystady.
Oqý-aǵartý mınıstrligi Tárbıe jáne qosymsha bilim departamentiniń dırektory Merýert Medetbekovanyń aıtýynsha, bıylǵy Prezıdent shyrshasyna 100 bala qatysyp jatyr. Onyń ishinde 20 óńirden 5 baladan tańdalyp alynǵan. Olardyń barlyǵy – óz ónerimen, sporttan, bilimnen oq boıy ozyp shyqqan shetinen alǵyr oqýshylar. Bas qalaǵa kelgen balalar úsh kúnnen beri arnaıy baǵdarlama aıasynda qalanyń kórikti jerlerin aralap, teatrdaǵy túrli qoıylymdardy tamashalady. Al búgin merekelik sharada ásem áýen men tátti kúıge toly baǵdarlamaǵa qatysyp, árqaısysyna Prezıdent atynan arnaıy sómke, IPad, ensıklopedııa kitaptarynyń toptamasy jáne kámpıtter tabys etildi.
Merekelik shyrshaǵa Jetisý oblysynan qatysqan 5-synyp oqýshysy Káýsar Almasqyzynyń qýanyshy qoınyna sııar emes. Sebebi syılyqtardyń arasynda ózi armandap júrgen zattaryn kórgende erekshe qýanǵanyn jetkizgen ol: «Maǵan jańa jyldyq kesh qatty unady. Prezıdent shyrshasyna alǵash ret qatysyp turmyn. Merekelik keshtegi anımatorlar da unady. Aıaz atanyń bergen syılyqtary da keremet eken. Al men óz atymnan búgingi keshke ánnen shashý shashamyn», dedi.
Kóńildi keshte elge tanymal óner sheberleri án men jyrdan shashý shashty. Myń buralǵan bıshiler men teatr ártisteri qyzyqty qoıylymdar kórsetti.
Aıta ketý kerek, dál osyndaı jańa jyldyq kesh respýblıkanyń ár óńirinde atalyp ótip, ónerli de ozat balalarǵa kóp qyzyq-qýanysh syılady.
