Foto: baribar.kz
Qýat kemip, qajyr sarqylǵandaı bolǵan shaqta kóbik qardyń ózi kóp-kórim júk. Egde adamdardy osy beınetten qutqarǵysy kelgen eriktiler oblys ortalyǵyndaǵy qarttar men múgedekterge arnalǵan pansıonattyń mańaıyn tazalap, qolǵabys etti. Birer kún buryn ǵana japalaqtap qalyń qar jaýǵan. Bıik kókten bılep, oınap jaýǵan qar aýmaǵy atshaptyrym aýlany da, jaıaý júrginshiler jolyn da jaýyp tastaǵan. Qoldaryna bir-bir kúrek ustaǵan jastar tyǵyzdalǵan qasat qardy kirpishteı oıyp alyp, áp-sátte tazalap shyqty. Sóz arasynda mundaı izgilikke toly izetti istiń aýdandarda da uıymdastyrylatynyn aıta ketelik. Eń jaqsysy, qınalǵan janǵa qol ushyn beretin jastar qatarynyń kóbeıe túsýi. Qar tazalanar, aýla kúreler, muqtaj jandardy meıirimdi júrek lúpilimen jylytatyn jas tolqyndy kórgende kóńilge senim uıalaıdy eken.
– Jastardyń osy bir meıirimdi isi kópke úlgi bolýǵa tıis, – deıdi «Meıirimdi júrek Lider.kz» qoǵamdyq birlestiginiń tóraıymy Irına Katýhova. Osynyń barlyǵy tálimdi tárbıeniń nátıjesi. Ustazdary men ata-analarynyń aqylynan uqqan ómirlik ustanym dep aıtsaq artyq bolmaıtyn shyǵar.
El qamyn oılaǵan eriktiler aýla tazalaýmen birge qarııalardyń otyndaryn jaryp, kómirlerin tasyp, qoldaryn uzartyp otyr. Meıirimdi jandar mekenindegi izgiliktiń aspany osylaısha jan jylýymen jadyraı tústi.
Kókshetaý
