Foto: 365info.kz
Astanadaǵy erekshe qajettiligi bar turǵyndar partııaǵa júginip, ınvataksı tapshylyǵy máselesin sheshýge kómek kórsetýdi ótingen. Osyǵan oraı partııanyń Respýblıkalyq qoǵamdyq qabyldaý bólmesi Kólik, Eńbek jáne halyqty áleýmettik qorǵaý, Densaýlyq saqtaý mınıstrlikteri jáne Astana qalasy ákimdigi ókilderiniń qatysýymen dóńgelek ústel uıymdastyrdy.
Joǵary suranysqa qaramastan, qalada tek 6 ınvataksı bar. Ol – gıdravlıkalyq kótergishi bar arnaıy kólikter. Saryarqa aýdany ákiminiń ınklıýzııa jónindegi shtattan tys keńesshisi Janat Qabdollanyń aıtýynsha, ınvataksıler tańǵy saǵat 9-dan keshki saǵat 6-ǵa deıin ǵana jumys isteıdi. Bul erekshe qajettiligi bar adamdardyń júrip-turýyn aıtarlyqtaı shekteıdi.
«Mundaı kestemen túngi kórsetilimge kınoǵa da bara almaısyń. Sonymen qatar erekshe qajettiligi bar adamdar kólikke óz kúshimen otyra almaıdy. Máselen, elektr arbaǵa tańylǵan adamdardy aıtýǵa bolady. Meniń arbamnyń salmaǵy 120 kılo ári jınalmaıdy. Bul jyl saıyn qaıtalanyp jatqan másele, sebebi biz qysta syrtqa shyǵa almaımyz. О́ıtkeni boranda aıaldamaǵa jete almaısyń, al mamandandyrylǵan arnaıy taksı barlyǵyna birdeı jete bermeıdi», dedi Janat
Qabdolla.
Astana qalasynyń turǵyny Ásemgúl Ábdirahmanova erekshe qajettiligi bar adamdardyń qoǵamdyq kólikti keńinen paıdalanýy úshin kommýnaldyq qyzmetterdiń jumysyn jaqsartý qajet dep sanaıdy. Omby qar júrip-turýynda aqaýy bar múgedekterge kedergi keltiredi.
«Kólikter 2010 jyldan beri jańartylmaǵan. Jolaı buzylyp qalatyn kezder de bolady. Amal joq, óz esebińnen qarapaıym taksıge aýysyp otyrýǵa týra keledi. Keıde dıspetcherge habarlasý da qıyn. Qoǵamdyq kólikterge keletin bolsaq, 10 jylda aıtarlyqtaı ózgeris bolǵanyn baıqadym. Qazir júrgizýshiler pandýsty túsirip, jaǵdaı jasaıdy. Iаǵnı oń ózgeris bar», dedi ol.
Eńbek jáne halyqty áleýmettik qorǵaý mınıstrliginiń aqparatyna sáıkes, byltyr Astana jáne Almaty qalalarynda erekshe qajettiligi bar adamdar úshin ınvataksı qyzmetin kórsetý kezinde taksı agregatorlaryn paıdalanýdyń qanatqaqty jobasy synaqtan ótkizildi. Bul qyzmet bir jylda 53,9 myń ret paıdalanylǵan. Eki qalada atalǵan qanatqaqty jobaǵa 639 adam qatysty. Joba aıasynda azamattar «Iаndeks Go» mobıldi qosymshasy arqyly ınvataksı negizinde jeńil avtokólikterge tapsyrys bere alady.
2024 jyly elordada ınvataksı qyzmetine shamamen 1,2 mlrd teńge qarastyrylǵan. Bul týraly Astana qalasynyń Jumyspen qamtý jáne áleýmettik qorǵaý basqarmasynyń basshysy Ilıa Skýb málimdedi. «Eger «Iаndeks Go»-men kooperasııa sátti jalǵasatyn bolsa, memleket qarajatty qalaı tıimdi bólý kerek ekenin anyqtaý úshin belgili bir sapar sanyn kúnine 3-4 ret belgileýdi usynamyz. Taksı baǵasy maýsym saıyn ózgeretinin eskersek, qysta tarıf baǵasy qymbattaıdy», dedi ol.
Partııanyń Respýblıkalyq qoǵamdyq qabyldaý bólmesiniń meńgerýshisi Álııa Sadyrbaevanyń aıtýynsha, elordada ınvataksı tapshylyǵyn sheshý – ózekti máseleniń bir parasy ǵana. «Partııanyń qoǵamdyq qabyldaý bólmelerine júgingen erekshe qajettiligi bar adamdardyń ótinishi olardyń ál-aýqatyn jaqsartýǵa erekshe nazar aýdarýdy qajet etetinin kórsetedi. Byltyrdyń ózinde 4,2 myńǵa jýyq ótinish kelip tústi. Mindetimiz – barlyq azamatqa, ásirese júrip-turýynda aqaýy bar adamdarǵa qoljetimdi, qolaıly orta qalyptastyrý», dedi ol.
Aıta keteıik, erekshe qajettiligi bar adamdardy qoldaý – «Amanat» jumysyndaǵy basty basymdyqtyń biri. Máselen, partııanyń «Halyqpen birge» saılaýaldy baǵdarlamasyn júzege asyrý aıasynda byltyr medısınalyq mekemelerdiń elektrondyq qujaty negizinde múgedektikti belgileý úderisi zańnamalyq túrde bekitildi. Sonymen qatar 5 myńǵa jýyq áleýmettik nysan beıimdelý, damý kemistigi jáne olardyń týyndaý qaýpi bar jas balalarǵa arnalǵan 8 erte aralasý ortalyǵy ashyldy. Sondaı-aq mektepterde ınklıýzııany qoldaýdyń 61 kabıneti ashyldy. Budan bólek, bıyl 1 qańtardan bastap I toptaǵy múgedektigi bar adamdarǵa arnalǵan járdemaqy 89 248 teńgeden 95 496 teńgege deıin, II toptaǵy adamdardyń járdemaqysy 71 398 teńgeden 76 397 teńgege deıin, III toptaǵy azamattardyń járdemaqysy 48 681 teńgeden 52 089 teńgege deıin ósti.
Talqylaý qorytyndysy boıynsha, is-sharaǵa qatysýshylar partııaǵa júgingen Astana turǵyndaryn Kólik mınıstrligi janyndaǵy jumys tobyna múshelikke kirgizý týraly kelisimge keldi. Jumys toby múgedek adamdardy tasymaldaý qyzmetine qatysty qoldanystaǵy erejelerge birqatar túzetý ázirleıdi.
