Alǵashqy kezderi tek oryssha (keıinnen aralas, ıaǵnı qazaq, orys tilinde, áli kúnge deıin solaı) shyqqan gazettiń aty da birneshe ret ózgertilgen.Máselen,ol ótken ǵasyrdyń alpysynshy jyldary «Kommýnızm úshin» (orysshasy «Za kommýnızm») degen atpen jaryq kórip turǵan. Al qazirgi ataýy «NAQTY» (Naqty). Bas redaktory – mundaı laýazymǵa ıe sanaýly qazaq qyzynyń biri, Aqparat salasynyń úzdigi, aýdandyq máslıhattyń depýtaty Atlana Janatqyzy Isaeva. Bizdiń de biraz jyl «Zaman jarshysy» atalǵan tusta bul basylymda ter tókkenimiz bar.
Sonymen, alpysynshy jyldary dedik qoı, sondaǵy redaktory qasıetti Qarasaı jeriniń bel balasy, belgili jýrnalıst-jazýshy, Uly Otan soǵysynyń ardageri, aýdannyń abyz aqsaqaly atanyp, júz jasaǵan marqum Úsenbaı Tastanbekov bolatyn. Ol kisi talaı talantty jan-jaǵyna jınaǵan jan edi. Buǵan bir mysal retinde osy jerge Shymkent jaqtan Almatyǵa qaraı kelgen áıgili fotosýretshi Saılaý Pernebaevty da jas shaǵynda jumysqa alǵashqy alǵanyn aıtqanymyz jón. Bul sózimizge Úsenbaı atamyzdyń Eńbekshiqazaq aýdandyq gazetine jetekshilik etkende tuma jyrdyń tunyǵy, uly aqyn Tumanbaı Moldaǵalıevtyń tuńǵysh óleńin jarııalaǵanyn qossaq she!
1961 jyly 10 mamyrda Qaskeleń qalasynda túsirilgen myna sýrette «Kommýnızm úshin» gazetinde qyzmet isteıtin jigitter beınelengen – Hasan Qazmuhanov (soldan ońǵa qaraı), Nursultan Álimqulov, Nursultan Júnisbaev, Grıgorıı Mýllın jáne Muhametjan Etekbaev.
Osylardyń ishinen Nursultan Álimqulov (án óleńiniń klassıgi atanǵan aqyn, «Qaıyqta», «Áli esimde», «Moıynqumda», «Altynym», «Alataý», «Tań samaly» tárizdi kóptegen tamasha ánniń sózin jazǵan) pen Muhametjan Etekbaev (qazaq balalar ádebıetiniń kórnekti ókili, týyndylary orys, nemis, ýkraın tilinde jaryq kórgen, Jambyldyń ádebı-memorıaldyq mýzeıin kóp jyl basqarǵan) qara úzip shyǵyp, shyǵarmalary men esimderi búkil qazaqqa tanyldy ǵoı!
Sóz sońynda eskerterimiz, bul sýret marqum M.Etekbaevtyń jeke muraǵatynan alyndy.
Berikbaı QADYQOV,
jýrnalıst
Almaty oblysy,
Qarasaı aýdany
