Aýdarmashy – qat kásip. Al jaqsy aýdarmashynyń qadiri, tipti, bólekshe. Biz úshin dástúrli sanalatyn orysshadan qazaqshaǵa aýdaratyndardyń qatary da sıreksip barady. Al burynnan da az kezdesetin qazaqshadan orysshaǵa aýdaratyndardyń qany, tipti, jerge tambaı tur deýdiń de artyǵy joq. Sol qany jerge tambaı turǵandardyń ortasynan Ǵosman Tóleǵul oıyp oryn alatyn. Onyń aýdarmalarynyń sanynyń ózi qaıran qaldyrady: Ǵosman Tóleǵul qazaqshadan orysshaǵa 43 kitap, orysshadan qazaqshaǵa 22 kitap aýdarǵan... Ol kitaptardyń kólemi ártúrli ǵoı degende de, bul – alapat eńbek! Sol aýdarmalardyń arasynda kórkem ádebıet týyndylary da az bolmaıtyn. A.Nurqatov, D.Dosjan, N.Kelimbetov, M.Maǵaýın, Q.Salǵara, M.Sárseke, taǵy basqa tulǵalardyń halyq úshin asa qajetti týyndylaryn tógilte sóıletken qalamger myna bizdiń de birer kitabymyzdy orystildi oqyrmannyń ortaq ıgiligine aınaldyrǵan edi.
Ol ómir boıy shyǵarmashylyq ujymdarda, memlekettik mekemelerde jumys istegen, aýdandyq, oblystyq gazetter redaksııalarynda jýrnalıst, oblys ákiminiń baspasóz hatshysy, oblystyq til basqarmasynyń basshysy, mınıstrliktiń bólim basshysy, oblystyq ardagerler uıymynyń tóraǵasy sııaqty qyzmetterdi birinen keıin birin aýystyrǵan. Sol laýazymdardyń bárinde de Ǵosekeńniń qalamgerligine qosa qaıratkerligi de kelisti kórinip otyrdy. Ǵosman Tóleǵuldyń týǵan tildiń tolǵaqty máselelerin jerine jetkizip aıtyp ta, jazyp ta kelgenin Arqa jurty jaqsy biledi, onyń bul saladaǵy jumysyn qadirleıdi.
Osydan tórt jyl buryn «Egemen Qazaqstan» gazetinde «О́ren júırik» degen maqala jarııalanǵan. Ǵosman Tóleǵuldyń 70 jyldyq mereıtoıyna oraılas jaryq kórgen osy eńbekte tárjime syndy asa qıyn iske bar ómirin arnaǵan, týǵan ádebıetimizdiń aýdarma qorjynyna mol olja salǵan azamattyń jankeshti eńbegine jan-jaqty baǵa berilgen. Qaıtersiń, mine, búgin sol tulpar talanttyń shabysy toqtapty, bar ómirin tildi kesteleýge, qasterleýge arnaǵan qaıratkerdiń qýatty qalamy qoldan sýsyp túsipti. Amal joq, endigi sózdi «О́ren júırik edi...» dep sóıleýge májbúr bolyp otyrmyz.
Baqul bol, qımas joldas, qymbatty Ǵoseke. Eńbegińdi eliń umytpaıdy.
Saýytbek ABDRAHMANOV,
Álibek ASQAROV
