Zilzalada pana bolǵan kıiz úı: Túrkııaǵa degen rııasyz peıilimizdi kórsetti

Qıyn-qystaý shaqta qazaq halqy da qarap otyrmaı, baýyrlas elge gýma­nı­tarlyq kómekti kúndiz-túni jiberdi. Sonyń ishinde jer silkinisiniń taýqy­metin tar­typ, qaıǵydan qan jutqan túrik­terge járdem bolǵan baspana – qa­zaqtyń kıiz úıin aıryqsha atap aıt­saq artyq etpes. Jurttan jı­nalǵan 20 mıllıon teńgege jýyq qarjyǵa al­ǵashynda 45 kıiz úı satyp alynǵan edi. Keıinnen bul saýapty da ıgi istiń sońy tolqyndy qýǵan tolqyndaı áser alyp, búkilhalyqtyq sıpatqa ıe boldy.

Túrkııaǵa kıiz úı jóneltý basta­ma­sy­nyń basy-qasynda júr­gen áriptesimiz Nurbek Bekbaýǵa habarlasyp, qaıǵydan qan jutqan halyqqa qanatymen sý sepken qar­lyǵashtaı qyzmet qylǵan qazaq­tyń kıiz úıiniń qazirgi kúıin surastyrdyq.

–Túrik baýyrlarǵa gýmanı­tar­lyq kómek retinde 100 kıiz úı alyp barmaq boldyq. Biraq jolda synyp qalǵany bar, ushaqqa syımaǵany bar, jalpy sany 92 kıiz úı jetkizdik. Olardy negizinen Hataı, Qahramanmarash, Gazıantep qalalaryna qurdyq. Odan bólek, otandyq kásipkerler 30 kıiz úı qosty. Osylaısha, jalpy sany 125-teı qazaq úıdi Túr­kııanyń 10 qalasyna tigip shyq­tyq, – deıdi belgili jýrnalıst N.Bekbaý.

Onyń aıtýynsha, yntaly topty Dúnıejúzilik etnosport konfe­de­ra­sııa­synyń prezıdenti Nájmeddın Bilál Erdoǵan qabyl­dap, Qazaqstannan 6 myń kıiz úı alýǵa tapsyrys bergen eken. Biraq elde birden myńdaǵan kıiz úı daıyndap bere qoıatyn seh bolmaǵandyqtan ári ınvestısııa jaǵy qıyndap ketken soń bul tapsyrys tolyq oryndalmapty.

– Qol qýsyryp, qarap otyrmaı biz qyrǵyz baýyrlardy da bul iske tart­tyq. «Air Astana» kom­panııasynyń qyzmetkeri Gúlim Qaıyrdenqyzy, kásipker Dastan Jumabaı úsheýimiz bilek sybana kirisip, qazaq jerinen Anadolyǵa bas-aıaǵy 2 myńnan asa kıiz úı jetkizdik. Qyrǵyzdar da sol eki myńnyń shamasynda kıiz úı jóneltti. Bul sharýa jalǵasyp jatty. Osylaısha, qajet etilgen 6 myń kıiz úı sanyn shyǵara aldyq, – deıdi N.Bekbaý.

N.Bekbaýdyń aıtýynsha, kıiz úılerdi Dúnıejúzilik etnosport konfederasııasy aldaǵy Kóshpeliler oıyndaryna qoldaný maqsatynda qoımasyna jınap qoıypty. Bul kıiz úılerdiń ishinde jýynatyn jeri, ájethanasy qosa qarastyrylǵan. Tabıǵı apattan qatty qıraǵan Qahramanmarash pen Hataı qalalarynda qurylys jumystary júrip jatqandyqtan, áli kúnge kıiz úıde turyp jatqan turǵyndar bar eken.

– Qala ákimshiligi olarǵa bir­neshe márte zamanaýı konteı­ner-úılerdi usyn­ǵan eken, biraq olar ózderine qaza­qy úı yńǵaıly ekenin aıtyp temir bas­panadan bas tartqan. Qazir sol Qahramanmarashta kıiz úıler qaz-qatar tigilgen úlken-úlken shaǵyn aýdandar bar. Halyqarlyq AFAD uıymy Lıvııada sý tasqyny bolyp, boran turyp, úıler qıraǵan kezde 500-ge jýyq kıiz úıdi sol elge gýmanıtarlyq kómek aıasynda jetkizipti. Jaǵdaı túze­lip, bári durystalǵan soń ol kıiz úı­lerdi qaıtadan Túrkııaǵa alyp kelgen, – degen N.Bekbaý keıbir kıiz úıler joǵary oqý oryndarynda, halyqaralyq kór­melerde, adam kóp júretin oryndarda da tigilgenin jetkizdi.

Osylaısha, baýyrlas elge qazaq pen qyrǵyzdan jetken 6 myń kıiz úıdiń tórt myńy jaǵ­daıǵa baılanysty túrli maq­sat­ta áli paıdalanylyp júr eken. Odan bólek túrkııalyq qa­zaq­tar da kıiz úıler suratqan. Olarǵa da berilmek. Bir sózben aıt­qanda, mıllıondaǵan qara­jat­qa jetkizilgen kıiz úıler qoı­ma­larda qur bosqa shań basyp jatqan joq.