Foto: olympic.kz
Jastar arasyndaǵy álem birinshiliginiń kúmis júldegeri degen ataǵy bar 19 jastaǵy Almatynyń týmasy eresekter dýyna qosylǵannan keıin ózin jaqsy qyrynan kórsetip júr. Bıyldyń ózinde Mıhaıl «Challenge Cup» dodasynda top jaryp, Qytaı men Horvatııadaǵy týrnırlerde júldegerler qatarynan kórindi. Desek te, jerlesimiz iri dúrmekterde daralanýǵa áli de daıar emes eken. Ony biz Úıeńki japyraqtar elindegi jarysta anyq baıqadyq. Qos baǵdarlamanyń qorytyndysy boıynsha nebári 234,19 upaı jıǵan Mıhaıl Shaıdorov 14-orynda qalyp qoıdy.
Erlerdiń básekesinde Ilıa Malınınniń (333,76 upaı) mereıi ústem boldy. Byltyr Saıtamadaǵa dúnıejúzilik dodada qola medaldi moınyna ilgen 19 jastaǵy AQSh-tyń mánerlep syrǵanaýshysy bul joly altyn tuǵyrdan qol bulǵady. Beıjiń Olımpıadasynda kúmis alyp, úsh birdeı álem chempıonatynda júldegerler qataryna qosylǵan Japonııanyń juldyzy Iýma Kagııama (309,65) ekinshi oryndy ıelense, Eýropanyń eki dúrkin chempıony, fransııalyq Adam Sıao Hım Fa (284,39) úshinshi satyǵa turaqtady. Al keıingi jyldardaǵy baıraqty básekelerdiń barlyǵynda qarsylas shydatpaı júrgen japonııalyq Sıoma Ýno (280,85) Kanadadaǵy jarystyń erkin baǵdarlamasynda óreskel qatelik jiberip, qorytyndy esepte tórtinshi oryndy qanaǵat tutty.
Áıelder saıysy Beıjiń Olımpıdasynyń kúmis júldegeri Kaorı Sakamotonyń (222,96) aıqyn jeńisimen aıaqtaldy. Osyǵan deıin qatarynan eki álem chempıonatynda qarsylas shaq keltirmegen Kúnshyǵys eliniń arýy bul joly da aldyna jan salmady. Amerıkalyq Izabo Levıto (212,16) kúmis alsa, ońústikkoreıalyq Kım Chheen (203,59) qolaǵa qol sozdy. Juptyq jarysta Kanada sportshylary – Dıanna Stellato-Dýbek pen Maksım Desham jeńimpaz atansa, bıshiler básekesinde amerıkalyq Medıson Chok pen Evan Beıtstiń baǵy jandy.
