Foto: Mádenıet jáne aqparat mınıstrligi
Atalǵan vedomstvo janynan qurylǵan jastar ádebı klýbynyń maqsaty – qazaq ádebıetindegi ózekti máselelerdi, jańa ádebı tendensııalar men shyǵarmalardy talqylaý, avtorlardy nasıhattaý.
«Memleket basshysy Ulttyq quryltaıda jalpy jastar tárbıesi, onyń ishinde kitaphanalardy damytý, jalpy kitap oqý máselelerin qolǵa alýǵa qatysty naqty tapsyrmalar berdi. Túptep kelgende negizgi maqsat – ult rýhanııatyn damytý, sapaly urpaq ósirý. О́ıtkeni, kitap oqıtyn bala rýhanı dúnıesi baı azamat bolyp óseri anyq. Bar ónerdiń túp negizi – ádebıet. Sondyqtan jas qalamgerlerge ortaq alań usynyp, ádebıettegi ózekti máselelerdi talqylaý – zaman talaby», dedi mınıstr Aıda Balaeva.
Otyrysta klýbtyń kún tártibi bekitilip, basshylyq quramy jasaqtaldy, aldaǵy josparlar da aıqyndaldy. Jıynǵa qatysýshylar zamanaýı ádebı prosess pen aýdarma salasyna, kitap shyǵarý jáne baspa isine, balalar ádebıetin damytýǵa qatysty oılaryn ortaǵa salyp, túrli usynystaryn aıtty.
Sondaı-aq ádebı agenttik, otandyq avtorlardyń shyǵarmalaryn nasıhattaý, kitap oqý mádenıetin qalyptastyrý tóńireginde ózekti máseleler kóterildi.
«Jas qalamgerlerge qoldaý kórsetýde búgingi basqosýdyń mańyzy zor dep esepteımin. Jańa ádebı klýb qazaq ádebıetiniń damý kókjıegin keńeıtip, ult rýhanııatynyń damýyna óz septigin tıgezedi dep oılaımyn», dedi memlekettik «Daryn» jastar syılyǵynyń ıegeri, synshy-ádebıettanýshy Baǵashar Tursynbaıuly.
Aıta ketsek, ádebı klýbtyń aldaǵy jıyndary Qazaqstannyń ózge de aımaqtarynda kóshpeli negizde uıymdastyrylady.
