Osy sapar qarsańynda semserlesýden Qazaqstannyń memlekettik jattyqtyrýshy Tımýr Baıtasov: «Qazirgi kezde biz Ońtústik Koreıa quramasynan 26 upaı ozyp turmyz. Iаǵnı Olımpıadanyń joldamasyna ıelik etýge múmkindik zor. Ol úshin shpagashylarymyz Qap taýy bókterinde barynsha nátıjeli óner kórsetýge tıis. Sonymen qatar Azııadaǵy basty qarsylastarymyz aldymyzdy orap ketpeýi kerek. Sonda otandastarymyz Parıjdegi oıyndarǵa tolyq quramda qatysady» dep óz josparlarymen bólisken edi.
Maıtalman mamannyń aıtqany dóp keldi. Atalǵan jarysta Ońtústik Koreıanyń shpagashylary 1/8 fınalda Chehııa quramasyna ese jiberip, úzdikter qatarynan kórine almady. Al bizdiń jigitter qarsy kelgenderdi qoǵadaı japyryp, shırek fınalda Olımpıada chempıony degen ataǵy bar Japonııa quramasyna jer sıpatyp ketti. Jartylaı fınalda Chehııaǵa jol bergen jerlesterimiz odan keıin Italııany utyp, qola medaldy qorjynǵa saldy. Sol arqyly Qazaqstan quramasy óz tarıhynda tuńǵysh ret Olımpııa oıyndarynda tolyq quramada óner kórsetýge múmkindik aldy. Bul komandanyń sapynda Elmır Álimjanov, Rýslan Qurbanov, Erlik Sertaı jáne Vadım Sharlaımov syndy saıypqyrandar óner kórsetti.
Jarys aıaqtalǵan bette BAQ ókilderine suhbat bergen komanda sapyndaǵy eń tájirıbeli sportshy Elmır Álimjanov: «Men úshin bul – besinshi olımpıadalyq sıkl. Osyǵan deıin tórt ret atalǵan jarysta tolyq quramda saıysqa túsýge múmkindigimiz boldy. Biraq sońǵy sátterde joldama ýystan shyǵyp kete berdi. Aqyry Tbılısıde kózdegen maqsatymyzǵa qol jetkizdik. Endi úsh sportshy jekelegen saıysta jáne barlyǵymyz komandalyq básekede baq synaımyz. Bul biz úshin tarıhı jeńis boldy», dep aǵynan jaryldy.
Jekelegen saıysta eń úzdik nátıjeni Rýslan Qurbanov kórsetti. Ol shırek fınalǵa deıin jetti. Sol mejede otandasymyz álem chempıonatynyń qola júldegeri, belgııalyq Neıser Loıolaǵa jol berdi. Nátıjesinde Qurbanov besinshi oryndy qanaǵat tutty.
