Foto: halyq-uni.kz
Dúnıejúzilik densaýlyq saqtaý uıymynyń málimetinshe, elimizde kórý qabileti nasharlaǵan 160 myń adam bar. Sol azamattarǵa arnaıy ázirlengen qosymsha ekrandaǵy habarlardy dybystap oqyp beredi. Atalǵan qurylǵynyń kómegimen paıdalanýshylar veb-betterdi, elektrondy hattardy, qujattardy ońaı sholyp, qazaq tilindegi jańalyqtarǵa qol jetkize alady.
– «Ekrandyq dıktor» qosymshasy «Aqparatqa qol jetkizý týraly» zańǵa sáıkes Til saıasaty komıtetiniń tapsyrmasy boıynsha ázirlendi. Barlyq azamatqa memlekettik tilde aqparat alýǵa múmkindik jasalýy kerek. Endi kórý qabileti nashar jandar kez kelgen aqparatty qazaq tilinde aýdıo arqyly tyńdaı alady. Alǵash ret ana tilimizde qyzmet kórsetetin baǵdarlama bolǵandyqtan daıyndaýǵa az ýaqyt ketken joq. Jobany ázirleý barysynda jasandy ıntellekti múmkindikterin paıdalandyq, dedi «Til-Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı.
Ekran dıktorynyń kóptegen qyzmeti bar. Máselen, tek smartfondarǵa ǵana emes, derbes kompıýter, planshet sekildi tehnıkalyq quraldarǵa da ornatylady. Paıdalanýshylarǵa pdf, txt, doc formatyndaǵy qujattardy oqýǵa múmkindik beredi. Sonymen qatar qoldanýshy ózi basqara alatyn pernetaqta pármenderiniń keń jıyntyǵyn jasaı alady. Bastysy, ınternettiń kómeginsiz-aq qajetti baptaýlardy ornatyp, oflaın rejimde jumys isteıdi. Qosymshany aldyn ala múmkindigi shekteýli jandar arasynda testileýden ótkizgen.
– Bul quraldyń ana tilimizde shyqqany qýantady. Shetelderde ekran dıktory burynnan bar. Buǵan deıin orys tilindegi qosymshany paıdalanyp júr edim. Endi ana tilimizde qoldana alatynyma qýanyp otyrmyn. Smartfondaǵy áreketterdi qazaq tilinde dybystap turady. Shıkilikter bar, árıne. Alaıda «Kósh júre túzeledi» degendeı, uıymdastyrýshylar aldaǵy ýaqytta áli de tolyqtyrý bolatynyn aıtty. Qosymshany jasap shyǵarǵan mamandarǵa alǵysymdy aıtamyn. Qýanyshtysy, daýystyń jyldamdyǵyn jáne yrǵaǵyn ózimizge yńǵaıly etip ózgerte alamyz, dedi jobany testileýshi Zııat Nurlanuly.
Álemdik standarttar negizinde jasalǵan mobıldi qosymsha ázirge Android qurylǵylary úshin qoljetimdi. Sáýir aıynda IOS qurylǵylaryna arnap shyǵarmaq. Veb-qosymshada 72 saǵattyq óńdelgen mátin oqylady. Baǵdarlamaǵa kirerde er nemese áıeldiń daýysyn tańdaý múmkindigi de bar.
Erkenaz QORDABAI,
L.N.Gýmılev atyndaǵy
EUÝ stýdenti
