Búginde Sergeev sý qoımasyndaǵy sý kólemi jobadaǵydan 182 paıyzǵa asqan. Bógetten asqan sýdyń bıiktigi 425 sm deńgeıine jetip, ázirge toqtap tur. «Qazgıdromettiń» habarlaýynsha, Sergeev sýqoımasyndaǵy Esildiń sýy Petropavlǵa 12–14 sáýir aralyǵynda jetip, 20 sáýirge deıin qaýip tóndiredi. Al Esil aýdanyndaǵy tasqynnyń álegi 14 sáýirge deıin sozylady. Al Qyzyljar aýdanyndaǵy tasqyn sáýirdiń 20-syna deıin bolady dep kútilip otyr. Kún qyzýymen kúrt erigen daladaǵy qar ózenderge quıylatyn sý kólemin 2 400 tekshe metrden 3 600 tekshe metrge deıin arttyrýy múmkin.
Premer-mınıstrdiń tapsyrmasymen aımaqtyq «Ortalyq» komandovanıesinen jetken 300 áskerı men Ulttyq ulan akademııasynan kómekke kelgen 400 kýrsant qum men topyraq toltyrylǵan qaptarmen bógetterdi nyǵaıtyp jatyr. Jastardyń jalyndy jigeri qosylǵannan beri bul jumystar kúrt jandanyp júre berdi. Al «Amanat» partııasynan saılanǵan oblystyq máslıhat depýtattary olarǵa ystyq shaı, as-sýyn aparyp berip, qoldaý kórsetip júr. «Biz aýyr jumys istep, qap arqalap júrgen jandardy bir mezgil tynyqtyryp, kóńilin demeý úshin keldik», dedi depýtattardyń biri Iýlııa Pronına.
Buǵan qosa qazirgi tańda sý tasqynyna qarsy is-sharalarǵa ákimdiktiń, TJ, PD-nyń 1 432 qyzmetkeri jáne 1 200 erikti qatysyp jatyr. Barlyǵyn qosqanda 3 myńnan asa adam tasqynǵa qarsy kúreske jumyldyrylǵan. Jedel shtabtar táýlik boıy jumys istep jatyr.
Zarechnyı kenti – Esil tasyǵan saıyn sý astynda qalatyn meken. Bıylǵy sý ondaǵy turǵyndarǵa aıryqsha qater tóndirip tur. Sondyqtan qalanyń ákimi Serik Muhamadıev olardy jáne saıajaıda turatyndardy evakýasııalanýǵa shaqyryp, tynym tappaı úndeý taratyp júr. Mundaǵy 236 aýlanyń 132-si qateri kúshti jerge ornalasqan. Bul jerlerde 240 adam turady. Alaıda jurttyń bári evakýasııanyń qajetti ekenin uǵa qoımaıdy. Mal-dúnıesin ıesiz tastap ketýden qorqady. Jasyratyny joq, bul tóńirekte úıi-kúıi joq qańǵybastar da kóp júredi. Tolyp jatqan saıajaılar da osy mańda. Sondyqtan úı ıeleriniń qorqýyna negiz bar. Oblystyq PD bastyǵy A.Qabduldınov arnaıy úndeý jarııalap, halyqtyń dúnıe-múlkiniń saqtalatynyn, polısııanyń kúndiz-túni kezekshilikte bolatynyn eskertti. Tek osy sózden keıin ǵana birneshe otbasy kóshýge bet aldy. Evakýasııalyq pýnkt qalanyń № 13 mektebinde ornalasqan. Sý qaıtqansha on shaqty kún turýǵa barlyq jaǵdaı bar. Petropavlda qarsy alatyn týystary men tanystary joqtar sonda aǵylyp jatyr.
Tasqynmen kúreske jumys kúshi men tehnıkalaryn jumyldyryp, qutqarýshylar men volonterlerdi ystyq aspen qamtamasyz etken kásipkerlerdiń de úlesi zor. Máselen, Amandyq aýlyn sýdan qutqaryp, sol jerdegi avtomobıl jolyn tesip, sýǵa ótkel jasaǵan «Taıynsha Maıy» JShS, «Besqaraǵaı» JShS, «Ilıchevka Astyq» jáne «Arhmontajs JShS kásipkerleri kóp kómegin tıgizdi.
Qaladaǵy qarǵyn sý jıi basatyn aýdannyń biri – Podgora. Aty aıtyp turǵandaı, bul – qalanyń oıynda ornalasqan aýdan. Qazaqshasy – Oıqala. Munda sý jınalatyn uzyndyǵy 4 shaqyrymdyq damba bar. Qazir sony kómekke kelgen sarbazdardyń arasynan júz shaqty adam nyqtap jatyr. Olarǵa jergilikti turǵyndar arasynan eriktiler kómek qolyn sozdy.
Tasqynnyń qaterinen arylmaı jatyp keıbireýler ótemaqy surap daýryǵyp jatyr. Osyǵan oraı oblystyq prokýratýra zardap shekkender bir aıdyń ishinde aryz berýi kerektigin eskertti. «Zardap shekkender TJ kúninen bastap 30 kúntizbelik ýaqyt ishinde jergilikti atqarý organdaryna shyǵynyn aıtyp, aryz-shaǵym berýi kerek», dedi olarǵa oblys prokýrorynyń birinshi orynbasary Ábý-Álı Sattar.
Oblys aýmaǵyndaǵy qarǵyn sýǵa alǵash bolyp tap bolǵan Ýálıhanov, Aqjar, Taıynsha aýdandarynda jaǵdaı qazir birshama turaqtandy. Oblystyq TJD bastyǵynyń orynbasary Murat Qanǵýjınovtiń aıtýyna qaraǵanda, 40 úı sýdyń astynda qalǵan. «Qazir olardyń keıbiri azdap qurǵady. 13 úıdiń turǵyndary úıine oraldy. Búginde oblysta tasqyn qateri joǵary Shal aqyn, Esil jáne Qyzyljar aýdandary men Petropavl qalasynyń shetkergi aımaqtary qaldy», dedi ol.
Qazir Sergeev pen Petropavl arasyndaǵy Pokrovka, Novonıkolsk jáne t.b aýyldardaǵy tasqyn sýdyń kólemi joǵarylap tur. Shetki úılerge sý kirip jatyr. Oblystaǵy úlken kólderdiń biri Torańǵuldyń da sýy arnasynan asyp, Kornevka selosynyń shetki úılerine sý kiripti. Negizgi qater Petropavldyń túbindegi Esildiń sýy tasıtyn 12 sáýirde bolýy yqtımal.
Soltústik Qazaqstan oblysy
