Kómek kerýeni

Bul qaıyrymdylyq is-shara «Júrekten – júrekke» aksııasy aıasynda iske asyryldy. Qalalyq assambleıa shahar­dyń eki tusy­nan arnaıy beket ashyp, túrli etnos ókilderi ma­terıaldyq kómek jınaǵan. Onyń jalpy kólemi 20 ton­naǵa jýyqtady. Jınaq­talǵan gýmanıtarlyq járdem dep otyrǵanymyz – makaron ónimderi, aýyzsý, basqa da azyq-túlik taýarlary, turmystyq hımııa, gıgıenalyq zattar, jyly kıimder, etikter, kórpe-tósek pen polıetılen qapshyqtary. Jóneltilgen gýmanıtarlyq kómek­tiń jalpy somasy 10 mln teńgeden asty. Materıaldyq kómek­pen birge assambleıa músheleri qarǵyn sýdan japa shekkenderge arnap ashylǵan banktik esepshottarǵa da qarjylaı kómek aýdara bastady.

Sheshen-ıngýsh etnomádenı birlestiginiń tóraǵasy Ramazan Mataev elimizdiń soltústigi men batysyn­daǵy tótenshe jaǵdaıǵa bar­shasynyń qabyrǵasy qaıysyp otyrǵanyn, osyndaı qıyn sátte birge bolýdy tilep, árdaıym qoldan kelgenshe kómek kórse­te­tinderin jetkizdi.

О́zbek etnomádenı birlestiginiń basshysy Tahırbek Nyshanbaev qaladaǵy 14 etnomádenı uıym bir jaǵadan bas, bir jeńnen qol shyǵaryp, jylý jınaýǵa assambleıadan arnaıy shtab ashqanyn málimdedi.

Qala­lyq koreı etnomádenı birles­tiginiń tóraǵasy Iýrıı Pan «Júrekten júrekke» aksııasy aıasynda jiberil­gen gýmanı­tar­lyq kómek qyzyl sýdan japa shekken atyraýlyq tur­ǵyn­dardyń ájetine jarar degen úmitte.

Al qalalyq slavıan etnomádenı bir­les­tigin basqaratyn Natalıa Romanova el basyna kún týǵanda búkil halyq jumyla túskenin jetkizdi. Mundaı qıyn sátte shet qalyp qoıýǵa bolmaıtynyn, ár azamat shamasy kelgenshe járdem kórsetý keregin baıan etti.

ShYMKENT