Prezıdent Qasym-Jomart Toqaev bul Qazaqstanda keıingi 80 jyldaǵy eń aýyr tabıǵı apat ekenin aıtty. Telearna arqyly halyqqa arnaǵan úndeýinde Toqaev myrza Úkimet sý tasqynynyń saldaryn joıý boıynsha jumysty kúsheıtkenin, barlyq qajetti kómek kórsetiletinin aıtty.
«Sý tasqynymen kúresýge Tótenshe jaǵdaılar mınıstrliginiń barlyq resýrsy tartyldy. Sondaı-aq qutqarý jumystaryna Ishki ister mınıstrligi, Ulttyq ulan, Qarýly Kúshter jəne Ulttyq qaýipsizdik komıtetiniń mamandary belsene atsalysyp jatyr. Zardap shekken aımaqtardyń əkimdikteri kúndiz-túni jumys istep jatyr. Ondaǵan myń volonter de kómektesip júr. Jaǵdaı óte kúrdeli bolsa da, biz qıyndyqty mindetti túrde eńseremiz, barlyǵyn qalpyna keltiremiz. Eń bastysy – azamattardyń amandyǵy», dedi Q.Toqaev.
Sý tasqyny toqtaýyn duǵasyna qosty
Rım Papasy Fransısk ár aptanyń sársenbisinde ótetin dástúrli aýdıensııasy kezinde Qazaqstan halqyna qoldaý bildirdi.
Rım Papasy Qazaqstannyń kóptegen aımaǵy zardap shekken, myńdaǵan adamdardy evakýasııalaýǵa májbúr bolǵan qatty sý tasqynynan zardap shekkenderdi qutqarý úshin duǵa etýdi surady.
Kaspıı teńizine quıatyn Jaıyq ózenindegi sý qaýipti deńgeıden 70 sm-ge asyp, 10 metrge jetkennen keıin eldi mekenderdi sý basty. 100 myńnan astam adam qaýipsiz jerge kóshirilgen.
«Men osy ýaqytta Qazaqstan halqyna rýhanı jaqyn ekenimdi jetkizgim keledi», dedi Rım Papasy 2024 jylǵy 10 sáýirde óziniń jalpy aýdıensııasynda sóılegen sózinde.
Bes bank pozısııasyn jaqsartty
Jetekshi reıtıng agenttikteriniń biri sanalatyn «S&P Global Ratings» óz boljamyn qaıta qarap, Qazaqstannyń bes bankisiniń pozısııasyn kóterdi.
S&P sarapshylary keıingi jyldary Qazaqstannyń bank sektory makroekonomıkalyq táýekelderge, ásirese aımaqtaǵy geosaıası turaqsyzdyqtyń kúsheıýi aıasynda tózimdilik tanytqanyn atap ótti.
Bank aktıvteriniń sapasy men qarjylaı kórsetkishteri taldaýshylardyń kútkeninen aıtarlyqtaı asyp tústi. Nátıjesinde, S&P ekonomıkalyq táýekelderdi baǵalaýdy jaqsartty jáne salalyq táýekelder úrdisin «oń» deńgeıine qaıtardy. Mysaly, 2024 jyldyń basyndaǵy jaǵdaı boıynsha merzimi ótken nesıelerdiń úlesi (90 kúnnen astam merzimi ótken) jalpy portfeldiń nebári 3%-yn qurady, bul ótken jyldarmen salystyrǵanda aıtarlyqtaı tómen boldy. Reıtıngige «Halyk Bank», «Kaspi Bank», «Bank CenterCredit», «ForteBank» jáne «Nurbank» sııaqty bankter endi.
AIX dırektorynyń oń pikiri
Astana halyqaralyq bırjasynyń (AIH) operasııalyq dırektory Olıve Gerıs aqparattyq portal tilshisine bergen suhbatynda Qazaqstannyń damýy týraly da óz oı-pikirin bildirdi.
Olıve Gerıs AIX-ke kelgenge deıin Qatar qor bırjasynyń bas operasııalyq dırektory qyzmetin atqarǵan. Onyń tájirıbesi AIX-tiń Ortalyq Azııada, odan tys jerlerde qarjy ortalyǵy retinde qalyptasýyna yqpal etken.
«Qazaqstan munaı men gazdyń iri óndirýshisi retinde óz ekonomıkasyn ártaraptandyrýǵa mindetti túrde umtylýy kerek. Men bilim salasynda (ásirese ýnıversıtetterde), aýyl sharýashylyǵyna qatysty kásiporyndarda, «Fintech/Smart Tech» kompanııalarynda aıtarlyqtaı jetistikterdi kórip otyrmyn. Qazaqstan – IT-men baılanysty jobalardyń ordasy, onyń jas turǵyndarynyń kásipkerlik jáne ınnovasııalyq bilim-biligi óte joǵary. Meniń oıymsha, qazir bul deńgeıge tek Saýd Arabııasy ǵana sáıkes keledi», deıdi Olıve Gerıs.
Jalpy, Olıve Gerıs sheteldik ınvestorlarǵa ınvestısııalyq ahýaldyń aıtarlyqtaı jaqsarǵanyn da atap ótti.
Mańyzdy kelisim
Qazaqstan men Makao tyǵyz baılanysty, týrızm men saýdany damytý maqsatynda eki aımaq arasynda vızasyz rejim engizý týraly kelisimge qol qoıdy. Vızasyz rejim eki óńirdiń azamattaryna bir-birine 14 kúnge deıin vızasyz kelýge múmkindik beredi.
Bul mámile Qazaqstannyń 2023 jyldyń qarashasynda Qytaımen kórshiles eki el arasynda vızasyz rejim engizgen burynǵy kelisiminen keıin jasalyp otyr. Alǵashqy kelisim Qazaqstan azamattarynyń Qytaıǵa túrli maqsatta, sonyń ishinde iskerlik, týrızm jáne emdeý maqsatynda saıahattaýyn jeńildetkenimen, ol Gonkong pen Makao sııaqty aımaqtarǵa taralmaıtyn edi. Endi Makaoǵa da jol ashylyp otyr.
