Foto: Úkimettiń baspasóz qyzmeti
Oral qalasynda sýmen jabdyqtaý jumysy 2 túrli kózden júzege asyrylady: jerasty sýlary men Jaıyq ózeni arqyly. Qalanyń 340 myń halqyn sýmen qamtamasyz etetin «Batys sý arnasy» kommýnaldy kásiporny qazir qalypty rejimde jumys istep tur. Máselen, qajetti sý men ony tazalaýǵa arnalǵan reagentter qory jetkilikti deńgeıde. Apatqa qarsy brıgadalar, kásiporynnyń 820 qyzmetkeri men 82 arnaıy tehnıka daıyn tur.
«Jaıyq ózeni boıyndaǵy strategııalyq nysandardy tasqynnan qorǵaý úshin bógetti nyǵaıtý boıynsha jumystar júrgizilip jatyr. Qala turǵyndaryn sýmen qamtamasyz etý jumystary aldyn ala qolǵa alynǵan. Sý tasıtyn arnaıy kólik qarastyrylǵan», dedi «Batys sý arnasynyń» bas ınjeneri Aıan Tasqalı.
«Jaıyqjylýenergosyna» 248 shaqyrymnan astam qalalyq jylý júıesi qaraıdy. Atalǵan nysandardyń aýmaǵynda, onyń ishinde asa qaýipti ýchaskelerde sý tasqynyna qarsy jumys aıasynda qum-qıyrshyq tas qospasymen toltyrý amaldary kúsheıtildi. Tıisti jumystarǵan 180 adam men 15 arnaıy tehnıka jumyldyrylyp otyr.
Tutastaı alǵanda, Batys Qazaqstanda barlyǵy 20 myń shaqyrymnan astam elektr jelisi bar. Aıtalyq, tórt aýdanda 20-dan astam, sondaı-aq Oral qalasynda 16 qosalqy stansa jumys istep tur. Olar qyrda ornalasqandyqtan sý basý qaýpi joq. Buǵan qosa preventıvti amaldar qolǵa alynyp, shahardaǵy eki qosalqy stansada qap tóseý, qorǵanys úıindisin ornatý jumystary qarqyn aldy. Sonymen birge apatqa qarsy brıgadalar, 1 400 qyzmetker men 140 arnaıy tehnıka daıyn tur.
Osy rette Jaıyq ózeninde ornalasqan sorǵy stansasyn qorǵaý sharalary da qabyldanǵanyn aıta keteıik.
«Jaıyq ózeniniń jaǵasynda «Jaıyqjylýenergo» mekemesin sýmen, sondaı-aq qala halqyn aýyz sýmen qamtamasyz etetin sorǵy stansasy bar. Odan kúndelikti shamamen 60 myń tekshe metr sý alamyz. Bul strategııalyq nysan bolyp sanalady. Sondyqtan onyń aınalasyna qap tósep jatyrmyz», dedi Energetıka jáne TKSh basqarmasy basshysy Mıras Múlkáı.
Esterińizge sala keteıik, Batys Qazaqstan óńirinde aldaǵy sý tasqynyna daıyndyq aıasynda qajetti kúsh jumyldyryldy. О́ńirde sý tasqynyna qarsy is-sharalarǵa barlyǵy 6,3 myńnan astam adam jáne 1,5 myń tehnıka tartylyp otyr. Turǵyn úı alaptaryn nyǵaıtý boıynsha sharalar qabyldanýda.
