Qoladan jasalǵan qanjardyń qyny altynmen aptalǵanymen, ishki bóligi ústiriktelgen juqa aǵash. Taqtaıshanyń ózi tórt bólikten quralǵan. Syrtqy qaptamasy usaq altyn monshaqtarmen kómkerile otyryp, oıýlanǵan. Birneshe jerden kógildir tústi tastarmen bezendirilgen. Qanjardyń joǵarǵy jaǵynda beldikke bekitetin tesigi bar. Ol bóligi de erekshe talǵammen kóbelek tárizdi etip jasalǵan. Janýarlardyń sımvolıkalyq belgilerine zer salsańyz, úsh eliktiń sýreti ornalasqan. Kontýr boıymen qarasańyz, astyńǵy jaǵynda jyrtqysh ań beınelengen. Munda tuıaqty janýarlardyń ekeýin artqa buryp, aıaqtaryn sál búge bederlepti. Jalpy, janýarlar dástúrli spıral tárizdi belgilermen beınelengen.
Aıta keterligi, altyn áshekeılengen taqtaıshalar qynnyń aldyńǵy bóligin ǵana qaptaıdy. Al artqy jaǵyndaǵy aǵash taqtaısha beti bylǵarymen qaptalǵan kórinedi.
Quıylǵan qola qanjardyń buıra tutqasy, kóldeneń qımasy tikburyshty, sál dóńgelengen betteri bar. Saptyń eki jaǵynda múıizdi tórt mýflon beınelengen. Saptyń bas jaǵy mysyq tuqymdas jyrtqyshtyń eki basy túrinde jasalǵan. Tumsyqtary qarama-qarsy baǵytta. Bastardyń morfologııalyq belgilerine súıengen zertteýshiler barystyń basyna sáıkes keledi dep boljaǵan.
Jalpy, qanjardyń uzyndyǵy – 29,4 santımetr bolsa, júzi –19,1 santımetr.
