Soltústikqazaqstandyq kásipker meshit salyp berdi

PETROPAVL. 5 qańtar. Esil aýdanyndaǵy Jarqaıyń aýylynda jańa meshit halyq ıgiligine tapsyryldy. Bul týraly «Qyzyljar» ortalyq meshitiniń baspasóz qyzmeti habarlady. Alla taǵalanyń jerdegi úıin osy aýyldyń týmasy, búginde Almatyda turatyn jeke kásipker Dýlat Qalıtov óz qarajatyna turǵyzdy. Ǵıbadathananyń saltanatty ashylýyna «Qyzyljar» ortalyq meshitiniń bas ımamy Kenjetaı qajy Baıkemeluly, aýdan ákimi Muratbek Ábishev Almatydan, Astanadan qonaqtar, aýyl turǵyndary qatysty. Jarqaıyń aýylynda alǵashqy meshit 1853 jyly salynypty. Ony ashýǵa Danııar bı Orazuly degen aqsaqal muryndyq bolypty. 1930 jyly qulshylyq orny buzylyp, mektepke aınaldyrylypty. – Meshit salýdaǵy nıetim dáýletimdi kórsetý emes, kerisinshe, aýyl jurty meshitsiz qalmasyn degen oıdan týǵan edi. Bıyl kásiporyn ashýdy josparlap otyrmyn», – deıdi jeke kásipker Dýlat Qalıtov. Ǵıbadathana qurylysyn tolyǵymen óz moınyna alǵan ol qajylyq paryzyn ótep kelipti. Mekke-Mádınaǵa jasaǵan saparynan ala kelgen Quran Kárim men jaınamazdy meshitke tartý etti. Árýaqtarǵa duǵa baǵyshtalyp, as berildi. Bir jarym jyldyń ishinde salynyp, paıdalanýǵa berilgen ǵıbadathanada kitaphana, ashana jumys isteıdi. Qazirgi kúni óńirdegi meshitter sany 67-ge jetti. О́mir Esqalı. Derek: «Qyzyljar» ortalyq meshitiniń baspasóz qyzmeti. Sýret: muftyat.kz.