Hokkeı • 25 Sáýir, 2024

Álemdik dodaǵa daıyndyq

80 ret

kórsetildi

3 mın

oqý úshin

Búginde shaıbaly hokkeıden Qazaqstannyń ulttyq quramasy Astanadaǵy «Barys Arenada» bas qosyp, osy keremet muz aıdynynda oqý-jattyǵý jıynyn ótkizip jatyr. Komandanyń bas bapkeri Ǵalym Mámbetálıev atalǵan jıynǵa elimizdiń barlyq myqty oıynshylaryn shaqyrtty.

Ǵalym SÚLEIMEN

Erler arasyndaǵy dúnıejúzilik doda 10-24 mamyr aralyǵynda Chehııada ótedi. Jerlesterimiz V tobyna tústi. Qarsylastarymyz – AQSh (2 dúrkin Olımpıada chempıony, 8 dúrkin kúmis jáne 1 dúrkin qola júldegeri, 2 dúrkin álem chempıony, 4 dúrkin kúmis jáne 9 dúrkin qola júldegeri), Shvesııa (2 dúrkin Olımpıada chempıony, 3 dúrkin kúmis jáne 4 dúrkin qola júldegeri, 11 dúrkin álem chempıony, 17 dúrkin kúmis jáne 16 dúrkin qola júldegeri), Slovakııa (álem chempıony jáne sol jarystyń úsh dúrkin júldegeri), Latvııa (álem chempıonatynyń qola júldegeri), Germanııa (Olımpıadanyń 3 jáne álemniń 5 dúrkin chempıony), Fransııa (Eýropa chempıony) jáne Polsha (Eýropa chempıonatynyń kúmis júldegeri) quramalary.

О́zderińiz baıqaǵandaı, qarsylastardyń barlyǵy da azýly. Qazaqstannyń hokkeıshilerinde ondaı ataqtyń biri de joq. Desek te kópten qalmaı, qalyń toptyń arasynda júrgen jaıymyz bar. Soǵan da shúkir deımiz. Osy sport túrin serik etken jerlesterimiz Olımpııa oıyndaryna eki ret qatysty. 1998 jyly Naganodada segizinshi oryn alsaq, 2006 jyly Týrınde toǵyzynshy satyǵa taban tiredik. Álem chempıonattarynda 11 márte boı kórsettik. Eń úzdik kórsetkishke 2021 jyly qol jetkizdik. Baltyq jaǵalaýynda ótken sol jarysta pleı-offqa joldama alýǵa shaq qalyp, 10-oryndy qanaǵat tuttyq. Buǵan qosa Azııa oıyndarynda – 4 altyn (1996, 1999, 2011, 2017 jyldary) men 2 qola (2003, 2007), Dúnıejúzilik Ýnıversıadada – 1 altyn (1995), 4 kúmis (1993, 2013, 2015, 2017) jáne 2 qolany (2007, 2023) enshiledik.

Chehııada jalaýy jelbireıtin jarysta A tobynda Kanada, Fınlıandııa, Shveısarııa, Chehııa, Danııa, Norvegııa, Aýstrııa jáne Ulybrıtanııa quramalary óner kórsetedi. Olar Pragada kúsh synassa, V tobyndaǵylar Ostravada oınaıdy.

Sońǵy álem chempıonaty byltyr Fınlıandııa men Latvııada ótken edi. Bul jarystyń bas júldesi Kanada quramasyna buıyrdy. Úıeńki japyraqtar eliniń ókilderi fınalda Germanııany 5:2 esebimen utty. Osylaısha, kanadalyqtar óz tarıhynda 28 márte tórtkúl dúnıeniń teńdessizi dep tanyldy. Bul – rekordtyq kórsetkish. AQSh pen Latvııa arasyndaǵy qola medal úshin tartys overtaımǵa deıin ulasyp, nátıjesinde 4:3 esebimen Baltyq jaǵalaýynyń órenderi jeńisti toılady. Bul – latvııalyqtardyń dúnıejúzilik dodadaǵy alǵashqy júldesi. Al Qazaqstannyń hokkeıshileri atalǵan jarysta Norvegııa (4:3, býllıt), Slovakııa (4:3, býllıt) jáne Slovenııaǵa (4:3) san soqtyrǵanymen, Chehııa (1:5), Shveısarııa (0:5), Kanada (1:5) jáne Latvııaǵa (0:7) ese jiberdi. Nátıjesinde, 11-orynǵa turaqtadyq.