Osydan da qazir elge shyǵa qalǵanda bolar istiń basynda júrgen jastardy kórseń, kádimgideı qýanyp qalasyń. «Shıelidegi Jaqaev aýylynda balabaqshadaǵy qyzmetimen qosa, eshki ósirip, kásip bastap otyrǵan Botagóz degen talapty jas bar» degendi buryn da estip júretinbiz. Jaqynda Memleket basshysy Botagóz Arqashbaevaǵa halyqaralyq áıelder kúnine oraı Astanada ótken saltanatty jıynda «Arý-ana» baıqaýynyń «Agrobıznes salasyndaǵy úzdik joba» atalymy jeńimpazy retinde marapat tapsyrdy.
Botagóz Qazanǵap atyndaǵy mýzykalyq kolledjdi horeograf mamandyǵy boıynsha bitirip shyqqan jas. Qazir Jaqaev aýylyndaǵy balabaqshada jetekshi retinde baldyrǵandardy bıge baýlyp júr.
«Kúndelikti jumysyma baryp-kelip, kesimdi aılyǵymdy alyp júre bersem de bolatyn edi. Biraq birde anam Lázzat Pármenqulova «eshki baǵyp kórsek qalaı bolady?» degen oı tastady. Áýelgide kádimgi qazaqy eshki ustadyq. Asyp ketkende 1 lıtr sút beretin. Bul sútti eshkiler jóninde izdeniske jol ashty. Qoldaǵy bar maldy satyp, asyl tuqymdy 5-6 eshki alǵanda bizge kúlgender de boldy. Biraq qarapaıym tuqymdastaryna qaraǵanda, sútti 5 ese kóp beretin bular kóńilden shyqty. Shamaly qor jınalǵasyn taza qandy teke aldyryp, tuqym tazalaýǵa kiristik», deıdi Botagóz.
Bastapqyda árıne, ońaı bolǵan joq. Syrttan kelgen Seksek ata tuqymynyń arasynda Syrdyń aptabyn kótere almaı aýyrǵandar da boldy. Botagózdiń anasy Reseıdegi mamandarmen baılanysty jolǵa qoıyp, emin izdedi. Jergilikti veterınarlar arqyly qajetti ekpesin saldyryp, taldamasyn tapsyryp, maldyń bar jaǵdaıyn jasady. Osynyń arqasynda qazir mundaǵy zaanın, anglo-nýbııalyq jáne fransýzdyq alpi eshkileriniń sany 100-den asady. Aıyna 2 tonnaǵa deıin sút saýyp, ony satýdan bólek maı shaıqap, qurt, brynza jasaıdy.
Osy baǵytta izdenip júrip bilgeni – eshki sútindegi maı túıirshikteri sıyr sútine qaraǵanda óte usaq bolǵandyqtan, aǵzaǵa tez sińedi eken. Quramyndaǵy kalsıı kóp sút balalarǵa óte paıdaly. Odan bólek, asqazany aýyratyndar, hımıoterapııa alǵandar basynan kelip, saýmal sııaqty iship ketip turady. Operasııa jasatar aldynda ımmýnıtet kóterý úshin ishetinder de az emes. Laqtar aldynda saýyndy toqtatqan sátte kezekke jazylyp qoıatyndar kóp. О́nimderin bizdiń oblystan bólek Almaty, Aqtóbe, Shymkent pen Jambyl óńirinen arnaıy aldyratyndar bar.
«Mal basyn kóbeıtý úshin memleket sýbsıdııa berdi. Bıznesti qoldaý baǵdarlamasy aıasynda qaıtarymsyz grant alyp, saýý apparattaryn aldym. Elimizde osyndaı sharýashylyqpen aınalysatyndarmen turaqty baılanys jasap turamyz. Orta Azııa deńgeıinde ótken saıystardan eshkilerimiz sútiniń maılylyǵy, qunarlylyǵy jaǵynan 2 márte júldeli oryndardan kóringende beınetimizdiń bir bıikke shyǵarǵanyna qýandyq. Bastaǵan isimniń bolashaǵyna senemin. Alda etti baǵyttaǵy býr, júni baǵaly angor tuqymdastaryn ósirip kórmek oıym bar. Memlekettik qoldaýdy paıdalanyp, eshki sútin, sút ónimderin daıyndaıtyn shaǵyn zaýyt ashqym keledi», deıdi keıipkerimiz.
Naǵashy atasy Melden jandy da, maldy kisi bolǵan eken. Balalarynyń basy qosylǵan jerde «Esiń ketse, eshki jı» degen qazaqtyń kóne naqylyn jıi aıtatyn kórinedi. Qazyna keýde qarııanyń sol bir bata-tilegi kenje qyzynyń perzenti Botagózge qut bolǵan sekildi.
Qyzylorda oblysy,
Shıeli aýdany,
Jaqaev aýyly
