– Ákem anamdy qatty unatyp qalyp, sezimin bildirgen eken. Á degende atam men apam ekeýiniń úılenýine qarsy bolypty. Sebebi balalarynyń tatar qyzyn ǵana áıeldikke alǵanyn qalaǵan. Biraq, ýaqyt óte anamdy olar da unatyp, kelisimderin bergen. Senimderine qaraı anam áýlettiń eń súıikti kelinderine aınalǵan. Men – úıdiń tuńǵyshymyn. О́zimnen keıin Ravıl esimdi inim bar. Kúıeýim Mıraspen 2007 jyly qyzmet babymen júrip tanystyq. Qaladaǵy «Kalken TV» telearnasynda vıdeomontajer bolyp jumys istep júrdim. Ol bizge operator bolyp jumysqa ornalasý úshin taǵylymdamadan ótýge keldi. Basshylyq maǵan «Oǵan kamerany qalaı ustaýdy, jaryqty qosýdy, rakýrsty aýystyrýdy úıret», dedi. Osylaısha, áriptes retinde sóılesip júrdik. 2008 jyly kóńilimiz jarasqan soń kezdese bastap, 5 jyldan keıin úılendik. Mıras – aqkóńil azamat. Úılengende qazaq, tatar, orys halqynyń salt-dástúrlerin saqtap, toı jasadyq. Betashar da boldy, – deıdi Oksana baqytty sátterin eske alyp.
Búginde ınternasıonaldy otbasy bir ul, bir qyz tárbıelep otyr. Qyzdary Samına on jasta, al uldary Bahtııar jetige kelgen. Ár merekege mán beretin olar jyl saıyn Naýryz, Qazaqstan halqynyń birligi kúnin, Qurban aıt, Sabantoı, Maslenısa, Pasha meıramdaryn erekshe atap ótedi. Balalaryna tusaýkeser jasap, uldaryn súndetke otyrǵyzǵan.
– Kóktemniń shýaqty meıramynda úıde et asyp, naýryz kóje, baýyrsaq pisiredi. Aq dastarqan jaıylyp, úsh ulttyń basy qosylady, emen-jarqyn áńgimelesip, kóńildi kesh ótkizemiz. Án de aıtylady, bı de bıleımiz. Analarymyz bir-birimen óte jaqyn aralasyp ketti. Kezdesken saıyn qushaqtasyp, syr aqtarysady. Otbasylyq otyrystarda ekeýi de, ákem de únemi kúlip, máz-meıram bolady. Ákem – óte qarapaıym adam. Bárimiz Dımashty tyńdaǵandy jaqsy kóremiz. Onyń ánderi únemi qosylyp turady, – deıdi Oksana.
Qyzdary telearnada balalarǵa arnalǵan «TV-Kids» baǵdarlamasyn júrgizedi. Sondaı-aq 2021 jyly «Naýryz Party» atty qalalyq baıqaýǵa qatysyp, jeńimpaz atanǵan. Baıqaýda óz ónerin kórsetip, qazaq halqynyń salt-dástúrine, tarıhyna qatysty suraqtarǵa jaýap bergen.
Al Oksana ózi bos ýaqytynda sýret salady, fıtnespen aınalysady. Mıras bolsa, fýtbol oınaǵandy jaqsy kóredi. Aıtýlarynsha, jyl saıyn qaıyrymdylyq aksııalaryna qatysady. Mysaly, 1 qyrkúıekte turmysy tómen shańyraqtan shyqqan jeti balaǵa oqý-quraldaryn alyp bergen. Jalpy, erli-zaıypty jyl kóleminde múmkindikterine qaraı muqtaj jandarǵa qarjylaı kómek kórsetip, juma kúnderi sadaqa beredi.
О́SKEMEN
