Italııada jumyssyzdyq deńgeıi rekordtyq kórsetkishke jetti

ASTANA. 9 qańtar. Italııada jumyssyzdyq deńgeıi buryn-sońdy bolmaǵan rekordtyq kórsetkishke jetti. Bul týraly ras.kz habarlady. Qazir munda eńbekke jaramdy jurttyń 13,4 paıyzy jumyssyz otyr. Appenın túbegindegi ISTAT ulttyq statıstıka ınstıtýty sársenbi kúni munyń 1977 jyldan bergi aralyqtaǵy absolıýtti joǵary nátıje ekenin jarııalap úlgerdi. Mine, jańa jyldyń basynda bul elde osylaısha budan 38 jyl buryn tirkelgen rekordqa ózgeris engizilip otyr. Al munyń alǵy sharty ótken jyldyń qarasha aıynda baıqala bastaǵan bolatyn. Sol kezde eldegi jumyssyz adamdar sany 3,45 mln. adamǵa jetip, kórsetkish sonyń aldyndaǵy qazan aıynan 1,2 paıyzǵa asyp túsken edi. Osy kúnderi jumyssyz júrgen jastar qatary tarıhı turǵydaǵy eń joǵary mólsherge kóterilip ketti. Olardyń 43,9 paıyzy jumyssyzdyqtyń qamytyn kııýge májbúr bolǵan. Osyndaı tendensııanyń kúsheıip kele jatqanyna qatty alańdaýshylyq bildirgen ıtalıan parlamenti ótken jyldyń sońynda eńbek rynogyna meılinshe qolaıly jaǵdaı týdyrýǵa baǵyttalǵan zańdy maquldady. Soǵan qaramastan, bul qujat ulttyq kásipodaqtar tarapynan ymyrasyz narazylyq týǵyzdy. Osynyń aldynda ǵana Eýropa parlamenti Grekııa, Italııa, Polsha jáne Fransııa elderine jumyssyzdyqpen kúreske kómek retinde 35,5 mln. eýro qarjy bólý jóninde sheshim qabyldady. Sheshimge Strasbýrgte ótken plenarlyq sessııada qol jetti. Al qarajat parlament sheshimin Eýropa keńesi maquldaǵannan keıin baryp, Eýropanyń jahandanýǵa beıimdelý qorynan bólinetin bolady. Parlament depýtattarynyń aıtýlarynsha, osynyń arqasynda atalǵan memleketter bılikteri Eýropadaǵy jahandaný úderisi men ekonomıkalyq kereǵarlyqtardyń zardaptarynan jumyssyz qalǵan 6 myńnan astam adamǵa nápaha taýyp bere alady. Mundaǵy áńgime negizinen Parsy shyǵanaǵy elderi avıatasymaldaýshylary tarapynan básekelestiktiń kúsheıe túsýine jáne otyn baǵasynyń kúrt qymbattap ketýine baılanysty jumystan shyǵyp qalǵan fransýzdyń Air France avıakompanııasynyń 3,8 myńnan asa qyzmetkeri týraly bolyp otyr. Osy úshin Fransııa úkimeti atalǵan qordan 26 mln. eýroǵa jýyq aqsha alady. Bul Eýroparlamenttiń qurylǵaly beri osyndaı maqsatty tirlikke berip otyrǵan eń kóp somasy bolǵaly tur. Álem ekonomıkasyndaǵy qıyndyqtar sondaı-aq tutynym suranysynyń túsip ketýine de aparyp soqtyrdy. Osynyń saldarynan grektiń Odyssefs Fokas atty bólshek saýda júıesi saýda kólemin kúrt kemitip alyp, 600 adamdy jumystan shyǵaryp jiberýge májbúr boldy. Kompanııa sondaı-aq grek bank júıesindegi problemalardyń saldarynan aıtarlyqtaı aýqymda qarjylaı shyǵynǵa batty. Nátıjesinde Afına Eýropa odaq qorynan 6,44 mln. eýro mólsherinde kómek alatyn boldy. Depýtattar sol sııaqty Italııanyń teristigindegi Trento avtonomııaly provınsııasynda ornalasqan turmystyq tehnıkalar shyǵaratyn Whirlpool zaýytyna 1,89 mln. eýro shamasynda qarjylaı járdem berýge uıǵarym jasady. Munda da suranystyń túsip ketýine baılanysty 600 adam jumystan shyǵyp qalǵan. Bir jaǵy osynyń da áser etýi saldarynan aımaqta 2013 jyly jumyssyzdyq deńgeıi 6,1 paıyzǵa deıin kóterilip ketti. Mundaı qıyndyqtardy Polsha kásiporyndary da tartyp jatyr. Sonyń bári – ıtalıannyń Fiat avtomobılderin shyǵaratyn zaýyt ta suranystan qaǵylyp, 1 myń adamdy jumyssyz qaldyrdy. Eýroparlament sondyqtan zaýyttan ketken 770 adamdy qaıtaryp ákelý úshin 1,26 mln. eýro bólýge áreket jasaýda. Jalpy, Eýropanyń jahandanýǵa beıimdelý qorynyń aqshalaı jıyntyǵynyń kólemi 150 mln. eýrony quraıdy. Ol jyl saıyn tolyǵyp turady. 2006 jyly qurylǵan qor básekelestikpen kúreste jeńilis tapqan transulttyq kompanııalar men jekelegen óndirýshilerge kómek kórsetýmen aınalysady. Ádette qoǵamdastyq elderi jurtty jumysqa ornalastyrý máselesin óz betterinshe tez sheship otyrýǵa umtylady. Sodan keıin Eýropa odaǵynyń kómegine júginedi. Áıtkenmen, bul joly bastalǵan jumyssyzdyq tolqynynyń jýyr mańda qaıta qalatyn túri kórinbeıdi. Aıdar О́risbaev. Derek: ras.kz. Sýret: euromag.ru.