Egov tutynýshylary «Sot kabınetin» avtorızasııasyz asha alady

ASTANA. 9 qańtar. Joǵarǵy Sot pen «Ulttyq aqparattyq tehnologııalar» aksıonerlik qoǵamynyń ókilderi «Elektrondy úkimet» (egov.kz) pen Joǵarǵy Sottyń «Sot kabıneti» elektrondy servısiniń (office.sud.kz) ıntegrasııalanýy máselelerin talqylady. Bul týraly egemen.kz tilshisi habarlady. Aqparattyq júıeler arasyndaǵy biryńǵaı avtorızasııany bildiretin Single Sign-On (SSO) mehanızminiń iske qosylýy ekijaqty yntymaqtastyqtyń basty jetistigi bolyp tabylady. Tutynýshy qosymsha avtorızasııasyz-aq talap aryz berý, sot hattamasyn elektrondy nusqada alýdy suratý týraly ótinish berý nemese hattamaǵa ótinish berý jónindegi suranysty qamtıtyn Joǵarǵy Sottyń úsh qyzmetiniń birin paıdalana alady. Endi bul qyzmetterdi alýǵa «Elektrondy úkimeti» portalynda avtorızasııadan ótýdiń ózi jetkilikti. «Aqparattyq tehnologııalardy sottarda qoldanýdy damytý maqsatynda «Sot kabıneti» aqparattyq servısi engizildi. Osylaısha, Joǵarǵy Sot el turǵyndary úshin sot júıesiniń barynsha ashyq ári qoljetimdi bolýyn kózdeı otyryp, zamanaýı tehnologııalardy qoldaný boıynsha jumystardy jalǵastyrýda», – dedi Joǵarǵy Sottyń janyndaǵy sottardyń qyzmetin qamtamasyz etý departamentiniń basshysy I.S.Ispanov. Jyl qorytyndysy boıynsha, atalǵan servıs arqyly 105 myńnan astam elektrondy ótinishter berilse, sonyń 85 myńnan astamyn talap aryzdar quraıdy. Sonymen qatar, elektrondy ótinishter berý júıesi 2011 jyldan bastap iske asyryla bastaǵanymen, onyń fýnksıonaldyq múmkindigi shekteýli bolatyn. «SSO tehnologııasy elektrondy qyzmetterdi neǵurlym yńǵaıly paıdalanýdy qamtamasyz etip, tutynýshylardy óz eseptik jazbasynyń derekterin birneshe ret engizý qajettiliginen bosatady», – dedi «UAT» AQ basqarma tóraǵasy R.S.Eńsebaev. Onyń aıtýynsha, ıntegrasııa kómegimen búginde 500 myńnan astam tutynýshyny biriktiretin azamattardyń mobıldik bazasymen birlesken sot óndirisiniń júıesi negizinde tutynýshylarǵa túrli habarlandyrýlar, aqparattar men shaqyrtý hattaryn jiberýdiń múmkindigi arta túsken. Bul mehanızm sot júıesine qoljetimdilikti arttyrýdyń kezekti qadamy bolyp tabylady jáne osy baǵyttaǵy turaqty qoljetimdilikti qamtamasyz etedi. «Sot kabıneti» elektrondy servısi istemeı qalǵan jaǵdaıda, talap aryzdar men ótinishterdi «Elektrondy úkimet» veb-portaly arqyly berýge bolady. Osy rette, elektrondy ótinish berý qyzmeti «Elektrondy úkimet» veb-portaly men «Sot kabıneti» servısinde qatar qyzmet kórsetetinin atap ótken jón. Joldybaı Bazar. Derek, sýret: Joǵarǵy Sottyń baspasóz qyzmeti.