Egiz sábı sáýlesi

Kez kelgen el kemel keleshegin óziniń óskeleń urpaǵymen baı­lanystyrary sózsiz. Ejelden qut-berekeniń basy dep sanalǵan qoı túligi jylynyń alǵashqy kúnderi qaraǵandylyq biraz shańyraqty náresteler únimen shattyqqa bólep, qýanyshqa qýanysh qosqan shaq boldy. Al ortany egiz qulyn toltyryp jatsa kóńil shýaǵy tipti shalqyr emes pe! Birinen soń birin ile dúnıege ákelgen Asylbek, Asy­laı atty sábıler jas anasy Dınara Qojahmetovany ata-ana, aǵa-jeńge, ini-sińlili aınalyp-tolǵanýda shek bolmaýy da sondyqtan edi. Aldyndaǵy úsh baýyry qushaǵyna ekeýiniń birden enýi aýyldan qalaǵa kelip, jańa ómir uıystyrǵan Dáýren men Dınara otaýlaryn úlken shańyraqqa aınaldyryp jibergen-di. Aldy otyzdan endi asqan erli-zaıyptylardyń osynsha jasta kóp balaly bolýlaryn jaratqan syıyna, taǵdyr baqytyna balaýy súısin­terlik sóz bolǵanyn qalaı aıt­paısyz. Bıylǵy jyl sábıler sánimen sáýlelenýiniń odan saıyn jar­qyraı bermektigin jaıǵandaı jaı edi bul. Byltyr oblystyq perınataldyq ortalyqta 91 ana egiz balaǵa jaryq dúnıe kózin ashtyrsa, bireýi úshemge ómir berdi. Ár sábıdi aıaly alaqandaryna alyp, alǵashqy qanatyn ashqan uıa dırektorynyń orynbasary Aleksandra Motorgına qýana aıtqandaı urpaq tabıǵı ósimi jyldan-jylǵa ulǵaıyp keledi eken. Munyń aldyndaǵy jylǵa qaraǵanda Qaraǵandy qalasynyń ózinde ǵana 300 balanyń artyq janǵa jan qosýy sony kórseter, kúnbe-kúngi ósip-ónýimizge táýbe derlik derek. «Qutty qonaq kelse, qoı egiz tabady», deıdi qazaq. Me­reı­li merekelermen, aıtýly oqı­ǵalarmen aıshyqtalmaq qoı jylynyń Qaraǵandyda egizderden bastalýy jaqsy yrym nyshany sııaqty. Kóbeıý elge kórik, eldikke tirek qoı. Egiz sábı sáýlesi jyl sáni bola túskeı. Aıqyn NESIPBAI, «Egemen Qazaqstan». QARAǴANDY.