Máskeýde oqyp júrgen kúnderdiń birinde leksııada ustazymyz bárimizden bir paraqqa súıikti aqynymyzdyń esimin jazyp berýdi surady. Professor azdan soń esimder jazylǵan paraqtardy jınap aldy da, áldebir stýdentke teksertip, tizim jasatty. Solaısha eń kóp atalǵan aqyndardyń rettik tizimi jasaldy. Shamamen 50-60 shaqty stýdenttiń tańdaý pikirinen shyqqan qorytyndy taqtaǵa jazyldy. Birinshi – Pýshkın, ekinshi – Lermontov, úshinshi – Esenın men Blok, tórtinshi – Ahmatova men Svetaeva. Osy bir tizim meniń balǵyn sanamdy sansyratyp jiberdi. Qazirgi Reseıdiń stýdent jastary búgingi modada júrgen Brodskıı, Mandelshtam, Vera Polozkova, Astahovalardyń esimin bilmeıtin bolǵany ma? Áli kúnge Pýshkın esimin qaıtalap júrgeni qalaı? Osy oılar mazalap, kóp ýaqyt sana túkpirinde júrdi. Keıin kele, Pýshkınmen etene tanysyp, onyń eshqashan qartaımas zańǵarlyǵyn, alyptyǵyn tanyp qaıran qala tústik. Alyp degen uǵymnyń mánisin Pýshkınge qarap túsindik.
Bir óleńi bir poemaǵa uqsas, neshe ǵasyrdy ýysyna ustaǵan Baıronnyń alyptyǵyna eshkim daý týdyra almas. Nebári 36 jasynda poezııada jańa betburys jasaǵan dara daryn bala kúninen-aq erekshe edi. Jazýshy Andre Morýanyń «Baıron» atty romanynda aqyn mineziniń qyrlary ashylady. Baıron óleńderi men qabat-qabat poemalaryn oqyp otyryp, anomalııaǵa ushyraǵan adam beınesindegi qubyjyq kózge elesteıdi. Sirá, Edgar Po, Bodler, Baıron bolmysynyń satanızmmen áldeqandaı baılanysy bary anyq. Bul jeke taqyrypqa júk.
Qazaq poezııasyna kóz júgirtsek, alyp degende oıǵa Abaı men Muqaǵalı keledi. Bul jaı aıtyla salǵan jattandy pikir emes, syǵymdalǵan eńbekten týǵan pikir dep qabyldarsyz. Muqaǵalıdyń alyptyǵyn Danteniń «Tamuǵyn» aýdarýynan-aq baıqaýǵa bolady. Al «Raıymbek, Raıymbek!», «Aqqýlar uıyqtaǵanda» poemalarynan aqynnyń aqyl-oı aýqymynyń keńdigi, alypqa tán talant tasqyny seziledi.
Alyp anadan týady. Biraq bul óte sırek qubylys ekenin aıttyq. О́te sırek.
