Matematık

Biz Jánetpen QazPI-diń matematıka fakýltetiniń tabal­dyryǵyn birge attap, tórt jyl qatarynan birge dáris aldyq. Qyzyqqa toly stýdenttik jyldardy da birge ótkizdik. Ol ónerli jigit retinde birden kózge tústi. Qolyna dombyrasyn alyp kúı tartqanda arqalanyp ketetin. Ásirese, Muqaǵalı aqynnyń óleńderine jazylǵan ánderdi keremet shyrqaıtyn. Jataqhana bólmelerinde týǵan kún bolsa, sol jerde dombyrasyn shertip Jánet otyratyn. Oqý bitirip, úlken ómirge joldama alǵannan keıin de bizdiń eńbek jolymyz birge jalǵasty. Jánet Kerimqulov eńbek jolyn sol kezdegi Kegen aýdany, Saty aýylyndaǵy A.Túrkebaev atyndaǵy orta mektepte matematıka pániniń muǵalimi bolyp bas­tady. Keıin Uıǵyr aýdanyndaǵy Qyrǵyzsaı orta mektebinde muǵalim bolǵan jyldarda óz isine maqsatty ári oıly kózben qaraıtyn, shákirt aldynda jaýapty tulǵa bolyp qalyptasty. Jas maman araǵa jyldar salyp, óz kásibiniń sheberi, oılaý qabileti joǵary, óz bilimin utymdy uıymdastyra biletin úlgili matematık retinde tanyldy. Osylaısha, ol matematıkanyń qyr-syryn úıretip júrip, shákirtteriniń jáne áriptesteriniń qurmetine bólene bastady. Bilimdi maman aýdanǵa da qajet. 1984 jyly aýdandyq bilim bóliminiń ınspektory qyzmetine shaqyryldy. Onda Jánet aýdan mektepterinde muǵalimderdiń bilim berýiniń ǵylymı jáne oqý-ádistemelik uıymdastyrýshylyq jumystaryna taldaý jasaýmen aınalysty. Oqýshylardyń bilimdi memlekettik bilim standarty deńgeıine qoljetkizýin qadaǵalap, nusqaý berip otyrdy. J.Kerimqulov birqatar jyl Uıǵyr aýdandyq bilim bólimin de basqardy. Odan keıin №4 Shonjy orta mektebinde matematıka pániniń muǵalimi, J.Qudaı­bergenov atyndaǵy orta mek­tepte dırektordyń oqý isi jónindegi orynbasary, Súm­be orta mektebiniń dırek­tory qyzmetterin atqaryp, oqýshy­lardyń oıdaǵydaı bilim alýyna jaǵdaılar jasady. Al 2008 jyldan beri ol Birlik-Súmbe orta mektebinde oqýshylarǵa matematıka páninen sabaq berip keledi. Jánet Kerimqulov aýdan turǵyndarynyń, muǵalimder men oqýshylardyń keıbir ózekti degen máselelerin sheshýde de tıisti jerde óz pikirin ashyq aıtyp otyrady. Olardyń sheshimin tabýyna yqpal etedi. Sondaı-aq, ol osydan bes jyldaı buryn aýdandyq «Urpaq paryzy» qoǵamdyq birlestiginiń tóraǵasy bolyp saılandy. Ulaǵatty ustazdan matematıka ǵylymyna qyzyqqan kóptegen shákirt bilim aldy, talaı jas mamanǵa jol kórsetti. Aýdan jastarynyń túrli baıqaýlar men konkýrstarǵa, basqa da is-sharalarǵa qatysýlaryna muryndyq boldy. Onyń shákirt tárbıeleýdegi eńbegi eskerýsiz qalǵan joq. «Qa­zaq KSR-i aǵartý isiniń úzdigi» tósbelgisimen, «Qazaqstan Respýb­lı­kasynyń Táýelsizdigine 20 jyl» merekelik medalimen, sondaı-aq, oblys ákiminiń, aýdan ákiminiń, bilim bóliminiń Qurmet gramotalarymen marapattaldy. Jan-jaqtylyǵymen erekshe­lenetin Jánet zamandasymyz bir­de qazaqy ázil-qaljy­ńymen barshamyzdy kúlkige keneltse, endi birde bı-sheshenderdiń ulaǵatty sózderin aıtyp, jigerińdi qaıraıdy. Utqyrlyǵy men tap­qyrlyǵyna kóńil súısinedi. Adam­dy jatsynbaıtyn jaıdary jan úlkendi de, kishini de ózine baýrap alatyn kishipeıil. Jánet pen Maırash búginde ulyn uıaǵa qondyryp, qyzyn qııaǵa ushyrǵan úlgili otbasy. Maı­rash – aýdanǵa belgili matematık muǵalim. Al ul-qyzdarynyń bar­­lyǵy joǵary bilimdi mamandar, ákeleri sııaqty ónerli jandar. Raısa QOIShYBAEVA, Shonjy medısınalyq kolledjiniń atqarýshy dırektory. Almaty oblysy, Uıǵyr aýdany.