Ronaldý úshinshi ret álemniń úzdik fýtbolshysy atandy

ASTANA. 13 qańtar. Portýgalııa quramasy men Madrıdtiń «Real» komandasynyń shabýylshysy Krıshtıaný Ronaldý osymen úshinshi ret álemniń úzdik fýtbolshysy atanyp, FIFA-nyń «Altyn dop» júldesin aldy. Bul týraly lenta.ru habarlady. Júldege úmitkerler qatarynda Argentına quramasy men Katalonııanyń «Barselona» komandasynyń shabýylshysy Lıonel Messı, sondaı-aq Germanııa quramasy men Mıýnhenniń «Bavarııasynyń» qaqpashysy Manýel Noıer de bolǵan. Daýys berý nátıjesinde Krıshtıaný Ronaldý – 37,66, Lıonel Messı – 15,76, al Manýel Noıer 15,72 paıyz daýys jınaǵan. Germanııa quramasynyń bas jattyqtyrýshysy Ioahım Lev 2014 jyldyń eń úzdik jattyqtyrýshysy atandy. Al koroldik klýbtyń taǵy bir oıynshysy Hames Rodrıges ótken jylda soǵylǵan eń úzdik goldyń avtory dep tanyldy. Jalpy, daýys berýge qurama komandalardyń 181 jattyqtyrýshysy, 182 qurama kapıtany jáne 181 BAQ ókili qatysty. Marapattaý saltanaty 12 qańtarda Shveısarııanyń Sıýrıh qalasynda ótti. Aıta keteıik, ótken jyldyń qorytyndysy boıynsha da «Altyn dop» Krıshtıaný Ronaldýǵa buıyrǵan edi. Al oǵan deıin bul júldeni tórt jyl qatarynan Lıonel Messı ıelengen bolatyn. Aıdar О́risbaev. Derek: lenta.ru. Sýret: afp.com.