Qar barysy tuńǵysh ret fototuzaqqa ilindi

Taıaýda Katonqaraǵaı aýdanyndaǵy Belqaraǵaı aýyldyq okrýginiń ákimi Dáýren Qalıbekov habarlasyp, Al­taıdaǵy ulttyq tabıǵı park qyzmet­ker­leriniń qar barysyn sýretke túsirip alǵany jóninde aıtty. Kózge kóp shalyna bermeıtin bekzat ańnyń beınesi sýretke tartylǵanyn estip, qýanyp qaldyq. Oqyrmannyń esinde bolsa, byl­tyr gazetimizde «Qar barysy. Altaı­da qanshasy qaldy?» atty maqala jarııa­laǵanbyz («EQ», 26 aqpan, 2014 jyl). Sol materıaldy jazý barysynda Altaıda qar barysyn kórgender bolmasa, sýretke túsirgeni týraly derektiń bolmaǵanyn baıqaǵan edik. Iаǵnı, Altaıdaǵy qar barysynyń sýreti – uzaq jyldar boıy taýdyń quz-jartastaryna, qııa-betkeıine qurylyp júrgen fototuzaqtardyń alǵashqy nátıjesi. Bul – Altaıdyń asqarynda bolmysy bólek, tekti ańnyń áli de bar ekenin dáleldegen aıǵaqty fotosýret bolyp otyr. Katonqaraǵaı memlekettik ulttyq tabıǵı parkiniń janýarlardy qorǵaý jáne óndirý bóliminiń bastyǵy Erik Qasymovqa qońyraý shalǵanymyzda, ol qar barysynyń Arshaty aýylynyń mańaıyndaǵy Qoraly degen jerge qurylǵan fototuzaqtyń obektıvine ilingenin jetkizdi. Oǵan deıin ótken jyldyń 30 qarashasynda kezekti baqylaý jumystary kezinde Arshaty ormanshylyǵyna qarasty «Bosaǵa» ýchaskesinde ormanshy Á.Qasymhanov, ormanshynyń kómekshisi J.Amanbaev, ınspektor M.Omarov, parktiń Aqsý fılıalynyń dırektory A.Kerteshev jáne orman qorǵaý ınjeneri B.Ábıev 900 metrge jýyq jerde ketip bara jatqan qar barysyn kórip, sýretke túsirip alǵan eken. Alaıda, alys­tan túsirgendikten qar barysynyń taspadaǵy sýreti buldyrlap, anyq kórinbegen. Tek kózderi ǵana shoq bolyp janyp tur. Osydan keıin park qyzmetkerleri qar barysy kóringen tusqa birneshe fototuzaqtar qoıǵan. – Shynyn aıtqanda, kóńilde bir úmit, bir kúdik paıda boldy. Degenmen, tókken terimiz, atqarǵan jumysymyz esh bolǵan joq. 2014 jyldyń 11 jeltoqsanynda qar barysy alǵash ret fototuzaqqa tústi. Bizdiń ulttyq park qyzmetkerleri úshin bul úlken qýanysh, joǵary jetistik. Osy oraıda saıatker-bıolog A.Múbárakov, aǵa ǵylymı qyzmetker A.Chelyshev, Arshaty ormanshylyǵynyń ormanshysy Á.Qasymhanov, ormanshynyń kómekshisi J.Amanbaev jáne ınspektorlar M.Omarov pen N.Badısoltanovtyń eńbekterin erekshe atap ótýge bolady. Aldaǵy ýaqytta bul baǵyttaǵy ju­­mys­tardy jalǵastyramyz, – dedi E.Qasymov. Saıatker-bıolog Nurlan Qarabaevtyń aıtýynsha, qazirgi kezde ulttyq parkte 50-ge jýyq fototuzaq bar. Al qar barysyn fototuzaq nebári 6 metr jerden eki márte túsirip alǵan eken. – Fototuzaq quraldary ornatylǵan ýaqyttan bastap Altaıda mekendeıtin ártúrli ań-qustar túsirildi. Olardyń ishinde kúdir, ular, sýyr, taýteke, qasqyr, maral, aıý, qoıan, sileýsin, bulǵyn, túlki syndy ańdar bar. Al osy joly alǵash ret qar barysy fotoobektıvke ilindi. Onyń aldynda 4-5 taýteke, kúdir júrip ótken eken. Soǵan qaraǵanda, barys ańnyń izin baǵyp kele jatqan bolýy múmkin, – dedi N.Qarabaev. Dýman ANASh, «Egemen Qazaqstan». Shyǵys Qazaqstan oblysy, Katonqaraǵaı aýdany.