Qostanaılyqtar 81 balany asyrap aldy

QOSTANAI. 14 qańtar. Qostanaı oblysynda 2014 jyly 81 adam bala asyrap aldy. Bul ótken jylǵa qaraǵanda 24 paıyzǵa az. Bul týraly ng.kz habarlady. Jasóspirimder isi jónindegi mamandandyrylǵan sot ótken jyl boıyna bala asyrap alý jóninde 81 azamattyq is qaraǵan. Aldyńǵy jyly 107 osyndaı is qaraǵalǵan bolatyn. Mamandandyrylǵan sot tóraǵasy Aızada Jánibekovanyń aıtýynsha, 43 kisi balalardyń týysy bolyp tabylady. 29 adam ata-ananyń qamqorlyǵynsyz memlekettik mekemede qalǵan balalardy asyrap aldy. Byltyr tek 4 bala ǵana shet el azamattarynyń asyrap alýyna berildi. Muhıt asqan balalardyń ekeýiniń jasy 3-te jáne ekeýiniń jasy 5-te. Balanyń ekeýin kanadalyq jubaılar alyp ketken. Mamandandyrylǵan sot tóraǵasy Aızada Jánibekova: «Eki balanyń da damýynda psıhıkalyq aýytqýshylyq bolǵan. Biraq kanadalyq ata-analar odan qoryqqan joq, kóp ýaqyt aralasqannan keıin balalardy Rýdnyı ınternatynan alyp ketti. Germanııaǵa ketkenderdiń osynda jetim qalǵan eki balasyn olardyń týstary, ıaǵnı sol eldiń azamattary asyrap aldy». Bala asyrap alýǵa bergen 7 aryz áli qaralmaǵan. Isti qaraýǵa daıyndap jatqanda belgili bolǵanyndaı, aryz berýshi balanyń óziniń ákesi bolyp shyqty. Ol úshin tıisti oryndar arqyly álgi adam ákelik quqyn qalpyna keltirýi qajet. Al eki is boıynsha balanyń bıologııalyq ákesine balasyn asyrap alýǵa kelisim berilgen joq. Ata-ana men balaǵa qatysty jyl boıyna 351 is kelip túsken. Olardyń ishinde 202 aryz ata-analyq quqynan aıyrýdy suraıdy. Bul barlyq istiń 42 paıyzyn quraıdy. Sot tóraǵasy túsken aryzdar kóbine balanyń emes, eresekterdiń múddesin oılaıtynyn qynjyla aıtty. Mysaly, balanyń bıologııalyq ákesi maskúnem, biraq ol narkologııalyq dıspanserde esepte turmaıdy. Mundaıda sýdıalarǵa talapkerdiń aryzyn qanaǵattandyrmaýyna týra keledi. Názıra Járimbetova. Derek: ng.kz. Sýret: aikyn.kz.