Aleksandr Bloktyń: «Keýdemde bar dúr qazyna, kilti onyń mende ǵana» degen óleń joly bar-tyn. Rasynda, ár adamnyń keýdesi sandyq toly zúbárjat syndy. Tek asha bilseńiz bolǵany. Fransýz jazýshysy Jan-Pol Sartr «О́zińdi tanyǵyń kelse, ózińdi tańda» degen danalyq sóz aıtady. Iá, ár jas áýel bastan ózin tańdap ómir súrgenimen, keıin tańdaýy ózgeredi. Qyzyqqysh, elikkish kúıler sana aýanyn san-saqqa burady. Konfýsıı izdengen adamnyń úsh joly bar ekenin kórsetedi. Birinshi – izdenis joly, ekinshi – elikteý, úshinshi – óz-ózińdi tabý joly. Shyǵarmashyl talanttyń kóbi eń ońaı ekinshi jolǵa túsip, qos shylbyrdy qolyna alyp júrgende úshinshi jol aldyna kese-kóldeneń turady. Bul úderis jıyrma men otyzdyń arasynda bolsa kerek.
Aıtpaq oı bul emes. Biz tańdaýdan shatasady ekenbiz. Máselen, siz bala kúnde Muqaǵalıdy tańdadyńyz. Aqyndy jan-tánińizben jaqsy kórdińiz. Adam kimdi jaqsy kórse, soǵan eliktemeı turmaıtyny belgili. Muqaǵalısha kúldińiz, Muqaǵalısha jyladyńyz. Bertin kele Tólegen Aıbergenovti tańdap, Tólegenshe tolǵandyńyz, Tólegenshe ǵashyqtyqtan baz keshtińiz. Shyǵarmashylyq izdenistiń belgili bir mejesine jetkende, ózińizdiń qandaı qudiretti jan ekenińizdi sezine bastaryńyz anyq. Ata-tegińizdi, ultyńyzdy, álemdegi, ómirdegi ornyńyzdy ańǵarasyz. Bir ýaqytta «Men!» deısiz jan ushyra. Iá, siz! Siz qudiretti jansyz! Siz bárinen myqtysyz! Siz ózińizdi tańdańyz! Sonda ózińizshe kúlýdi, ózińizshe sóıleýdi, ózińizshe jyndanýdy bastaısyz.
...Kóshede ózin tańdaǵan jan aıańdap keledi. Júzi nurly, sózi meıirban, tolyq óz keńistiginde, óz jalǵyzdyǵynda. Aqyndar jón aıtady, «kim sezse jalǵyzdyǵyn sol meıirban».
