Altron dáýiri

Keshe «Kerýen» oıyn-saýyq ortalyǵynda ótken «Kek alýshylar: Altron dáýiri» fılminiń tusaýkeseri kópshilikti eleń etkizdi. Sonda jıylǵan dúıim jurttyń tamashalaǵany – qyzyl kilemge ásemdenip, sáni men saltanatyn kórsetýge shyqqan kıno akterleri emes, úlken ekrannan solardyń qazaqsha sóıleýi. Uıym­dastyrýshylardyń aıtýynsha, bul – 2011 jyldan beri qazaq tiline aýdarylǵan 11-shi fılm. «Bo­lashaq» qaýymdastyǵy buǵan deıin «Kólikter – 2», «Qara kıimdiler», «Batyl júrek», «Jańa órmekshi adam», «Galaktıka saqshylary» sııaq­ty álemdik ozyq fılmderdi dýblıajdady. «Kek alýshylar: Al­tron dáýiri» fılmi de osy basta­manyń jalǵasy. Bıýd­jetine 250 mln. dollar jum­salǵan kınoónim júktelgen mindetti mejeden asyra oryndady. «Biz úshin bul kún mańyzdy. Sebebi, álemdik deńgeıdegi osy fılm qazaq tilinde jaryq kórdi. Kınodaǵy 5 keıipker búgingi tilmen aıtqanda – qaharmandar, árqaısysy eli úshin jan berýge bar. Sońyna deıin kúrese biledi. Bizdiń óskeleń urpaq úshin bul fılmniń tárbıelik máni óte zor dep bilemiz» dedi jobanyń ıdeıalyq avtory ári bastamashysy – Baýyrjan Baıbek. «Kek alýshylardyń» ekinshi bóliminiń rejısseri – «Satýrn» amerıkalyq syılyǵynyń ıegeri jáne «Oskar» syılyǵynyń nomınanty Djoss Ýıdon. Basty rólderdi jahandyq Marvel jul­dyzdary – «Altyn Globýs» jáne «Satýrn» syılyǵynyń ıegeri kishi Robert Daýnı, Skarlett Iohanson, Krıs Hemsvort, Krıs Evans, Oskar syılyǵynyń nomınanttary – Mark Rýffalo, Djeremı Renner jáne Semıýel L.Djekson oınaǵan. Qazaq tilin­degi dýblıaj rejısseri Tımýr Ba­lymbetov. «Batyl júrek» mýlt­fılmindegi keıipkerdiń ánin salǵan belgili ánshi Maqpal Isabekova osy fılmde keıipker Skarlett Iohansonnyń daýysyn dybystasa, Jasulan Baısalbekov Altronnyń, Beıbit Qamaranov Tordyń, Erjan Jarylqasynov Temir adamnyń, Erǵalı Tólebaev Kapıtan Amerıkanyń, Baqytjan Jarmuhambetov Qyran kózdiń, Samat Qordabaev Halkti ana tilimizde sóıletti. Sheteldiń synshyl dybys mamandarynyń synynan súrinbeı ótkender ǵana osyndaı jaýapty mindetti arqalapty. «Irikteý ońaı bolmady, óıtkeni, bul fılmdi jastar jaǵy kóbirek kóretin bolǵan soń, daýysty qımylyna saı qyzyqty etip qubyltyp otyrý kerek dedi. Eń qıyny, Halkke ıne salynyp, onyń qubyjyqqa aınalatyn tusynda daýysyn salýǵa kóp jattyqtym. Buryn biz álemdik fılmderdi qashan qazaqshalaıdy ekenbiz, bizdiń ózgeden nemiz kem dep oılaýshy edik. Qazir sol kúnge jettik, men óte qýanyshtymyn» deıdi er júrek Halktiń atynan sóılegen Samat Qordabaev. Elimizde dýblıajdyń rejısseri, rejısserdiń kómekshisi, dybys rejısserleri, tamasha aýdarmashylar men osy salanyń bilikti mamandarynyń úlken mektebi bar dep aýyz toltyryp aıta alamyz. Alysqa barmaı-aq, «Kek alýshylardy» dybystaǵan akterlerdiń dıksııasy, tili taza. Daýys tembri qulaqqa jaǵymdy estiledi. Qazaq­tyń dýblıaj mektebiniń qansha­lyq­ty deńgeıde ekendigin «Kek alýshylar» fılmi taǵy bir ret dálelde­di. Osy istiń basy-qasynda júrip, muryndyq bola bilgen «Bolashaq» qaýymdastyǵy, «Nur Otan» par­tııasy, «Kassa Nova Bank» AQ jáne «Meloman» kompanııasy Marvel stýdııa­synyń qosqan úlesi erekshe. Sátti bastamanyń alǵash­­­qy shymyldyǵyn ashqan – «Kólik­ter-2» mýltfılmine Elbasy joǵa­ry baǵasyn bergen bolatyn. Fılmniń aldyn ala kórseti­limine balalar úıiniń tárbıe­le­nýshileri shaqyryldy. Olar ózderi sekildi taǵdyrlas balalardyń ónerine súısindi. О́ıtkeni, fılm­niń dýblıajyna jobanyń turaqty qatysýshylaryna aınalǵan, Baǵa­nashyldaǵy № 1 Balalar úıiniń tárbıelenýshileri qatysyp, dybystaýǵa atsalysqan. Shetel kınoteatrlarynda aǵylshyn tilindegi fılmderdiń sýbtıtri retinde sol eldegi basym ulttyń tili qosymsha beriledi. Bizdiń elde ózge eldiń fılmderi túpnusqa tilde úlken ekrannan kórsetilmeıdi. Desek te, syrttan kelgen, qazaq tilin úıre­nemin degen qonaq úshin shetel kıno­laryn qazaqshalaý mártebemizdi asy­ra túseri anyq. Desek te, sapaly otandyq fılmderdiń úzdik qata­ryn kóbeıte tússek, batyr da, dana da, qaıratker de ózimizde jeterlik. Qundyz ERALY.