Ekstravert – ózgelermen aralas-quralasqa beıim, til tabysýǵa, dos bolýǵa qushtar jandar. Bul tıptegi adamdar el aldynda sheshile sóılep, minberlerden jurtty eliktirip alyp kete alady. Ári kez kelgen qýanyshy men súıinishin syrtqy ortamen bólisip, kóbine ishte syr saqtamaıdy. Al ıntrovert adamdar – ońashalyqty súıetin, óz ishine tereń úńilip, jan keńistiginde ómir súretin jandar. Introvertter kópshilik ishinde júrýdi qup kórmeı, jalǵyzdyqqa jany eltip turady. Kisimen lezde qarym-qatynasqa túse almaı, tuıyq, jabyq kúıde ǵumyr keshedi. Psıhologter ıntrovertter kóbine shyǵarmashylyq adamdary bolatynyn aıtady.
Qoǵamda ekstravertter kóp pe, álde ıntrovertter kóp pe? Menińshe, ekstravertter kóp. Únemi jurttyń nazarynda bolǵysy keletin, aralasatyn adamdary da kól-kósir, ortany baýrap sóz sapyryp, baqytty ishten emes, syrttan izdeýge beıim bul tıp ár tustan qylań beredi. Nege ekstravertter kóp? Sebebi qoǵam adamdardy soǵan tárbıeledi. Teledıdardan kim kóp kórinse, sol juldyz, sol adamdardyń aldy sanaldy. Kimniń tanys-tamyry mol, tili juqa, minezi buryshsyz bolsa, sol dittegenine tez jetti. Al úndemeı-aq úıdeı is tyndyryp, aıǵaısyz-aq ultqa tolaǵaı eńbek sińirip júrgen qarapaıym eńbek adamdary nazardan tys qaldy. El rýhanııatyna sony lep qosqan, ulttyń aqylyn arttyrǵan irgeli ǵalymdardan dene eńbegimen aınalysatyn sportshylar tanymal, betke ustar boldy. Dańǵaza jasamaı-aq, sabyrmen tereńge bet qoıǵan ónerpazdan, qur daýsyn zoraıtqan «ýaqyt qurbany» artyq sanaldy. Mine, osy tendensııalardan bolmysy anomalııaǵa ushyraǵan ekstravert urpaq ósip jetildi.
Álemge sáýle shashqan úzdik jańalyqtyń kóbi tuıyq adamdar qolymen, ıaǵnı ıntrovertter arqyly ashylǵan desedi. Olar – óz isiniń mamany, óz basynyń kapıtandary. Konfýsıı aıtqandaı, «áke – áke, al ul – ul bolyp», «árkim óz aýlasyn sypyrsa, búkil qoǵamnyń taza bolary» anyq.
