ORAL. 11 maýsym. Batys Qazaqstan oblysy Qaztalov aýdanyndaǵy Qaıyńdy aýylynyń turǵyny Aslan Jaıynovtyń qarmaǵyna alyp jaıyn ilindi. Bul týraly egemen.kz tilshisi habarlady.
Bizben áńgimesinde Aslan:«Jalpy men balyq aýlaýdy kásip etken emespin. Tek qol bosaǵanda aýyl irgesindegi ózenge qarmaq salyp. Azyn-aýlaq túsken maıda balyqtarǵa qanaǵat etip júre beremin. Oılamaǵan jerden úlken jaıyn ustap alǵanym – sondaı kúnderdiń biri edi. Qarmaǵyma baqa baılap salyp qoıǵan edim. Qasymda eshkim joq. Qannen qapersiz otyrdym. Bir kezde qarmaǵyma balyq túskenin baıqadym. Áıtse de oǵan eki-úsh keli olja shyǵar dep onsha kóńil bóle qoımadym. Degenmen, qarmaǵymdy tartyp qarasam, birden aýyrlap sala berdi. Tartaıyn desem álim jetetin emes. Sodan soń aıqaılap aýyldastarymdy kómekke shaqyrdym. Alaıda eshkim kele qoımady. Alysyp júrip alyp jaıyndy áreń jaǵaǵa shyǵardym. Sol ýaqytta ǵana qasyma kórshilerim keldi. Bári tań qalyp jatyr. Úıge súırep ákelip, ólshep qaraǵanda jaıynnyń uzyndyǵy 2 metr, salmaǵy 45 kılo tartty», – dep, bul ómirindegi qarmaqpen ustaǵan eń úlken balyq ekenin aıtty.
Temir Qusaıyn.
Derek, sýret: egemen.kz.
