О́z esimin ózi qoıǵan bala

– Balaqaı, atyń kim? – dep suradym. «Mundaı balanyń aty-jónin bile júrgen de durys» dep oılaǵam bolsam kerek, sirá.

– Beıbarys.

– O! Keremet esim eken. Shamasy, úıde atań bar ǵoı, seniń atyńdy sol kisi qoıǵan boldy ǵoı?

– Joq, men óz atymdy ózim qoıyp aldym.

«Myna bala ne dep tur? О́z atyn ózi qoıǵany qalaı?». Túk túsinsem buıyr­masyn.

– Sonda qalaı? – dedim ony sózge tarta túsip.

– Ol solaı. Mýltfılm kórdim «Beı­barys» degen. Sosyn atymdy Beıbarys dep qoıyp aldym, – degen bala endi meni suraqtyń astyna ala bastady:

– Al, siz Beıbarystyń kim ekenin bilesiz be?

Bilýin bilemin ǵoı azdap bolsa da. Biraq meniń de balany synap kórgim kelip ketti. «Joq, bilmeıdi ekem. Beı­barys degen kim ol?» dedim. Ishimnen «myna bala maǵan ne deıdi eken?» degen qyzyǵýshylyq týdy.

– Beıbarysty bilmeısiz be? Ol degen batyr, soǵysta bárin jeńedi.

– Ony sen qaıdan bilesiń?

– Mýltfılm bar ǵoı. Sonda Beı­barys bárin jeńedi. Ony kórgen joqsyz ba?

– Joq, kórgen emespin.

– Kórý kerek.

Mine, ǵajap! Jas bala meni «oqytyp» jatyr. «Beıbarysty» kórmegen bolsań, kór» deıdi. Balanyń munysyna ishim jylyp qaldy. Endi she? Ultymyzdyń uly tulǵasyn taný kerektigin jap-jas bolyp saqaly sapsıǵan maǵan «túsin­dirip» jatsa, nege súıinbeske? Demek bul ba­lanyń qanyna álden-aq batyr babanyń rýhy sińgen. Ultymyzdyń erteńine keıde alańdaýshylyq bildirip jatatynymyz da belgili. Biraq mynaý Beıbarysty kórgen soń, ulttyń kelesheginiń kemeldigine degen senim nyǵaıa túskendeı boldy.

Kýpeden jylaǵan balanyń daýysy estildi.

– Meniń inim ǵoı jylap jatqan. Onyń aty – Aısultan. Biraq óskende ol da Beıbarys bolady, – dedi qasymdaǵy bala.

– Nege?

– Men oǵan da «Beıbarys» mýlt­fılmin kórsetemin.

«Qazaqy rýhtaǵy mýltfılmder kerek» degendi zııalylarymyzdyń nege jıi másele etip kóterip jatatyny endi túsinikti boldy...