Ǵalymdardyń pikirinshe, dál mundaı nysan burynǵy zertteýlerde kezdespegen. HV-XVI ǵasyrlarǵa tán nysan kúıdirilgen kirpishten qalanǵan eken. Alaıda san jyl boıy qum jasyrǵan keseneniń kúmbezi qırap qalǵan. Al jabyq dálizi sol qalpynda saqtalypty.
«Mundaı keseneler Saraıshyq qalasynda buryn da tabylǵan edi. Biraq qatty búlingeni anyqtalǵan bolatyn. Bul keseneniń dromosy tolyq saqtalyp qalǵan. Ázirge aldyn ala boljam boıynsha munda mártebeli adam jerlengen bolýy múmkin», deıdi arheolog Amangeldi Zaınov.
Onyń aıtýynsha, esigi ońtústik shyǵysqa qaraǵan dromostyń uzyndyǵy – 170, bıiktigi 60 santımetr. Ázirge dáliz jartylaı qazylǵan.
«Qazba jumysy úsh bólikke bólip júrgizildi. Dálizge jalǵasqan kólemdi qabirdiń qabyrǵasy tabyldy. Anyqtalǵan qabyrǵanyń uzyndyǵy – 6, bıiktigi – 1 metr, qalyńdyǵy 55 santımetr.
«Bul keseneni salýǵa sary jáne qyzyl kirpish paıdalanylǵan. Sary kirpish – Altyn orda dáýiriniń eski kirpishi, al qyzyl kirpish qurylys salynarda kúıdirilip jasalǵany anyq. Bul – Saraıshyqtaǵy eń sırek kezdesetin nysan», deıdi arheologııalyq qazbaǵa qatysqan stýdent Erasyl О́mirbek.
Dromostyń ońtústik bóliginde sharýashylyq bólme bolǵany anyqtalǵan. Qazba kezinde qysh qumyralar men túrli buıym, ortaǵasyrdaǵy sándik japsyrmalar, mys tıyndar tabyldy. Ortaǵasyrlyq qaladaǵy qazba jumysyna H.Dosmuhamedov atyndaǵy Atyraý ýnıversıtetiniń 19 stýdenti atsalysty. Endi aldaǵy ýaqytta arheologııalyq nysandy zertteýdi jalǵastyrý kózdelip otyr.
Atyraý oblysy
