Elbasy Álemdik jáne dástúrli dinder lıderleri V seziniń jalpy otyrysyna qatysty

ASTANA. 11 maýsym. Memleket basshysy Álemdik jáne dástúrli dinder lıderleri V seziniń jalpy otyrysyna qatysty. Bul týraly akorda.kz habarlady. Qazaqstan Prezıdenti otyrysqa Iordanııa koroli II Abdallanyń qatysyp otyrǵanyna, ol bastamashylyq etken «Amman joldaýy» men Álemdik jáne dástúrli dinder lıderleri seziniń úndestigine, bul bastamalardyń órkenıetter men konfessııalar arasyndaǵy syndarly dıalogty damytý úshin qajetti tuǵyrnama qyzmetin atqaratynyna nazar aýdardy. Nursultan Nazarbaev jumysy aıaqtalýǵa taıaǵan sezdiń delegattary qonaqjaı qazaq jerine taǵy da jınalý arqyly basty maqsatqa qol jetkizgenin atap ótti. «Dinder, halyqtar jáne memleketter arasyndaǵy tatýlyq pen kelisimniń asa mańyzdy ekendigin túsiný úshin bir-birimizge taǵy bir qadam jaqyndaı tústik. Dinderdiń ózara yqpaldastyǵy men olardyń jahandyq damý jolyndaǵy róli týraly ashyq suhbat jalǵasyn tapty. Álemniń turaqtylyǵy men qaýipsizdigi jolyndaǵy yntymaqtastyqqa degen ortaq múddelestik bar ekeni ańǵaryldy. О́mirdiń ózekti máseleleri jóninde sezge qatysýshylardyń barlyǵynyń ortaq nemese uqsas ustanymdary kórinis tapqan deklarasııa maquldanyp, qabyldandy. Qazaqstannyń elordasynda eki kún boıy túrli tilde, túrli dástúr boıynsha beıbitshilik, kelisim, ádilettilik, keshirimdilik jáne jaqynyńa degen súıispenshilik týraly ortaq tilek-duǵa jasaldy», – dedi Memleket basshysy. Qazaqstan Prezıdenti sezge qatysýshylardyń bárine jemisti jumystary úshin alǵys aıtty. «Qudaıǵa jasaǵan qulshylyqtary arqyly Qazaqstannyń ósip-órkendeýine nıettestik bildirip, elimizge baq-bereke tilegeni úshin túrli dinniń barsha qyzmetshilerine alǵys aıtamyn. Sezdiń barlyq zaıyrly qonaqtaryna – saıasatkerlerge, qoǵam qaıratkerlerine, sarapshylar men jýrnalısterge is-sharany tabysty ótkizýge, bizdiń ıdeıalarymyzdy ilgeriletýge qosqan baǵa jetpes úlesteri úshin shyn júrekten rızashylyq bildiremin. Dúnıede senim men aqyldy ushtastyratyn aqıqattan artyq eshteńe joq. Álemdik jáne dástúrli dinder lıderleriniń sezderi rýhanı tulǵalar men saıasatkerlerdiń suhbaty formatynda ótip keledi. Osylaısha biz adamdar arasyndaǵy tatýlyq pen kelisim máselelerine qatysty is-qımyldyń izgi sıpaty ar-ujdan men rýhanı qýat arqyly arta túskenin qalaımyz. Barsha qatysýshylardy Sezdiń ıgi ári beıbitsúıgish ahýalyn óz pikirlesterine, seriktesterine jetkizýge shaqyramyn», – dedi Nursultan Nazarbaev. Memleket basshysy Álemdik jáne dástúrli dinder lıderleriniń V sezi jahandyq dıalogtyń ózektiligin, onyń qajettiligi arta túskenin taǵy da aıqyn kórsetip bergenin aıtty. «Sóz ben til, ıaǵnı, tildesý men dıalog – adam balasyna, adamzatqa berilgen qudaıdyń teńdessiz syıy. Bizdiń paryzymyz – onyń bitimgershilik jáne jasampaz qýatyn tolyǵymen paıdalaný. Búgingi besinshi sezde jalpyǵa ortaq tatýlyq pen meıirim, ádilettilik pen rýhanı úılesim dáýirine qaraı taǵy bir qadam jasaldy. Biz jahandy kúmán-kúdik jaılaǵan kezeńde tek bir-birimizben tildesý arqyly ǵana úmitti, bolashaqqa degen senimdi oıatýǵa bolatynyn dáleldedik», – dedi Qazaqstan Prezıdenti. Budan bólek, Nursultan Nazarbaev sezdiń qyzmetine qatysty usynystaryn aıtty. «Qazirdiń ózinde sezimizdiń baı tarıhy qalyptasyp úlgerdi. Biz betpe-bet dıalog ornatý jóninde eleýli tájirıbe jınaqtadyq, suhbattasý men ózara túsinisý dástúrlerin ornyqtyrdyq. Dinder men órkenıetterdiń ózge de ózara yqpaldasý uıymdarymen baılanys jolǵa qoıylyp keledi. Sondyqtan men Astanadaǵy osynaý ǵımaratta Beıbitshilik jáne kelisim murajaıyn ashýdy usynamyn. Sezimizdiń tarıhyna degen mundaı ıgi kózqaras, adamzattyń damý problemalary jónindegi birlesken sheshimder tájirıbesin jınaqtap, qorytý dinder men halyqtardyń tatýlyǵy men ózara túsinistigin nyǵaıtý úshin asa mańyzdy bolmaq. Beıbitshilik jáne kelisim murajaıy sondaı-aq, dinder men mádenıetter dıalogy tarıhyn zertteıtin sezd janyndaǵy ǵylymı mekeme bolady», – dedi Memleket basshysy. Qazaqstan Prezıdenti dinder men mádenıetter dıalogyn ilgeriletýshi tulǵalardy marapattaýdyń da mańyzdylyǵyna toqtaldy. Osy oraıda Memleket basshysy «Rýhanı tatýlyq pen kelisimdi damytýǵa jáne nyǵaıtýǵa qosqan úlesi úshin» atty syılyq taǵaıyndaýdy usynyp, ony Dindarlar keńesiniń sheshimi boıynsha berýge, sezdiń jalpy otyrysynda tapsyrýǵa bolatynyn aıtty. Nursultan Nazarbaev sezdiń eki kúndik jumysy álemge damýdyń eń qolaısyz ssenarıılerine jol bermeýge bolady degen úmit syılaǵanyna, adamzat danalyǵy men jaýapkershiligine degen senim uıalatqanyna nazar aýdardy. Otyrys barysynda Iordanııa Koroli II Abdalla, BUU órkenıetteri alıansynyń ókili N.ál-Naser, Mınsk jáne Zaslavsk mıtropolıti, Búkil Belarýs Ekzarh Patrıarhy Pavel, EQYU bas dırektory L.Zaner, Bedford epıskopy, Aǵylshyn shirkeýiniń ókili R.Atkınson, «Djındjıa Honche» Sıonıstik hramdar qaýymdastyǵynyń basqarýshy dırektory T.Teraı, ISESKO bas dırektory A.at-Týeıdjrı, Dúnıejúzilik lıýteran federasııasynyń prezıdenti M.Iýnan sóz sóıledi. Otyrys qorytyndysy boıynsha Álemdik jáne dástúrli dinder lıderleriniń V seziniń deklarasııasy jarııalandy. Elaman Qońyr. Derek, sýret: akorda.kz.