ATYRAÝ. 26 sáýir. Atyraý oblysynda jas saılaýshylardyń biri Gúldana Elemesova týǵan kúninde alǵash ret daýys berdi. Bul týraly egemen.kz tilshisi habarlady.
Atyraýda daýys berý bastalysymen saılaý ýchaskelerine asyǵa jetkenderdiń biri –Gúldana Elemesova. Qazir ol Halel Dosmuhamedov atyndaǵy Atyraý memlekettik ýnıversıtetinde ekonomıka jáne quqyq fakýltetiniń 2-kýrsynda oqıdy.
«Men úshin dál búgingi kúnniń eki ereksheligi bar. Birinshiden, men bıyl el bolashaǵy úshin alǵash ret mańyzdy tańdaý jasadym. Iаǵnı, birinshi ret saılaýǵa qatysyp, daýys berdim. Ekinshiden, dál búgin – meniń týǵan kúnim. Demek, meniń ómirinde bul kún erekshe este saqtalady», – deıdi Gúldana Elemesova.
Dál osy kúni alǵash ret óz tańdaýyn jasaǵan jastardyń qatarynda keshe 18 jasqa tolǵan atalǵan oqý ornynyń taǵy bir stýdenti Imanǵalı Tólepov te bar. Sonymen birge, Atyraý qalasyna taıaý ornalasqan Tomarly aýylynyń turǵyny Nyshan Jubaeva bıyl 104 jasqa tolypty. Ǵasyrdan da uzaq ǵumyr jasaǵan ájeniń óz úıinde daýys berýi úshin №64 saılaý ýchaskesinen jyljymaly jáshik ákelindi.
«Biz ómirdiń qıyndyǵyn kóp kórdik. Allaǵa shúkir, endi elimizdiń birligi, zamanymyzdyń mamyrajaı tynyshtyǵy buzylmasyn», – dedi óz daýsyn bergennen keıin 104 jastaǵy saılaýshy Nyshan Jubaeva.
Bul kúni Atyraýdaǵy №2016 áskerı bólim sardarlary men sarbazdary da daýys berdi. «Biz, áıelim Merýert ekeýmiz elimizdiń qýatty memleketke aınalýy úshin óz tańdaýymyzdy jasadyq», – deıdi osy áskerı bólimniń sardary, maıor Ǵalymjan Jýrhaev.
Atyraý oblysynda búgin 304 593 saılaýshy 232 saılaý ýchaskesinde óz tańdaýyn jasaýy tıis bolsa, kúndizgi saǵat 12:00-ge deıin olardyń 47,54 paıyzy daýys berip úlgerdi. Daýys berýde Isataı (72,41%), Qyzylqoǵa (58,38%) jáne Qurmanǵazy (55,08%) aýdandarynda saılaýshylardyń belsendiligi baıqalyp otyr.
Joldasbek Shópeǵul.
Derek: egemen.kz.
Sýret: Rahym Qoılybaev.
