«Egemen Qazaqstan» gazetiniń tilshi qosynyna jasy kelgen qart ana birneshe ret telefon soqty.
Artynan ózi de keldi. Seksenge tolǵan qarııa eken. Aty-jónim – Qamarııa Dúısenova, dep tanystyrdy ózin. Áp degende, ol kisiniń aıtaıyn degen aryzynyń túpki mánin uǵa almaǵandyqtan, keınirek taǵy bir kezdesip sóılesýdi uıǵarǵan edik. Sol kelisim boıynsha zeınetker keshe bizge taǵy da habarlasyp, qabyrǵasyna qara tastaı batyp júrgen jaıtty áńgimelep berdi. 2005 jyldyń 17 mamyry kúni balam Mahmut Dúısenov Oral qalasynan bir úı satyp alyp edi. Ol ony 2006 jyly maǵan syı retinde aýdardy. Sodan beri osy úıdiń aýla-sharbaǵyn zańdastyra almaı kelemin. Onyń qujattyq rettelýin kútemin dep júıkem ábden juqaryp bitti. Bul ózi bir aýlanyń ishinde eki páter ornalasqan úı. Bar túsinbestik dál osy aradan týyndap otyr. Iаǵnı, meniń úıim qaladaǵy A.Skorobogatov kóshesi № 42 úıdiń aýlasynda №2 bolsa, kórshim О́tegen Ermekovtiń úıi № 1 páter bolyp esepteledi. Al osy №1 páterdiń tehnıkalyq pasportynyń túpnusqasy joq. Sóıtip, aınalyp kelgende, onyń kesiri maǵan tıip otyr. Olaı bolsa, sharbaqtyń qujaty nege meniń atyma jazylmady? Mundaı jaǵdaıda bul sharbaq qalaısha ortaq aýla bolmaq?! Osy saýaldardy alǵa tartyp, barmaǵan jerim, baspaǵan taýym joq. Alaıda, onyń bárinen eshqandaı nátıje shyqpady. Oral qalasy ákimdiginiń turǵyn úı kommýnaldyq sharýashylyǵy bóliminen bilgenim: ádilet departamentine memlekettik tirkeýden ótýi úshin kórshim О́tegen Ermekovtiń tehnıkalyq pasportynyń túpnusqasy mindetti túrde bolýy kerek eken. Al onyń joqtyǵyna meniń qandaı kinám bar?! – dep tańdanysyn jasyra almaıdy ájeı. Sondaı-aq, Qamarııa Dúısenova úı qujatynyń aktisi ekige bólinip ketkenin qynjyla aıtyp berdi. Tipti, ózgesin aıtpaǵanda, meniń úıimniń qujatynyń ekige bólingen nusqasynyń biri kórshim О́tegen Ermekovtiń qolynda júr. Sonda men ne isteýim kerek, dep sharasyzdyq tanytady Qamarııa apaı. Áıteýir, úıimniń qujattary komıýterde turǵan soń onyń durystyǵyna eshkim kúmán keltire almaıtyn shyǵar degen úmittiń jeteginde áli júrip kelemin. Áıtse de, kári qoıdyń jasyndaı jasym qalsa da shyndyqqa kóz jetkize alatyn túrim joq. Meniń úıimniń qujattarynyń bári de durys. Tek qujattyń ekige bólinip ketkeni qatty qınaıdy. Osy jaǵdaıdyń oryn alǵanyna da alty jyl tolyp otyr.
Temir QUSAIYN, «Egemen Qazaqstan».
Batys Qazaqstan oblysy.
Sýret:eldorado.ru
