QOSTANAI. 26 sáýir. Tańerteńnen jaýǵan jaýyn tús aýa sirkirep basylǵan joq. Qolshatyryn kóktemniń jeline qalqalaı ustaǵan qostanaılyqtar saılaý ýchaskelerine qaraı jyldamdata basyp, daýys berýge asyqty. Daýys berý túusten keıin de tolastaǵan joq. Saǵat 16. 00 kezinde oblys turǵyndarynyń 80 paıyzy daýys berip úlgerdi. Bul týraly egemen.kz tilshisi habarlady.
Uly Otan soǵysynyń ardageri, Qazaqstannyń eńbek sińirgen kólik qyzmetkeri, KSRO –nyń qurmetti temirjolshysy, Qostanaı oblysynyń qurmetti azamaty Bertran Rýbınshteın №21 saılaý ýchaskesine keldi. Qostanaıdaǵy kópti kórgen, quımaqulaq aqsaqaldardyń biri Bertran Iosıfovıchti de sońǵy jyldary kárilik basyna bastady. 93-ke qaraǵan qarııa qazir qyzy, fılologııa ǵylymdarynyń doktory Elena Iosıfovnanyń súıemeldeýimen júredi. Ol bıýlletenin alyp, óz tańdaýyn jasady.
Uly Otan soǵysynyń ardageri Bertran Rýbınshteın:«Jasym toqsannan asty. О́mirdi qıyn kúndermen bastadyq. Uly Otan soǵysyna qatystyq, aman elge kelgen soń eńbekke aralastyq. Keýdemde janym barda eldiń tynyshtyǵy, baqyty úshin qalaı únsiz otyramyn? О́z daýysymdy berip, azamattyq ustanymymdy tanyttym. Aınaladaǵy otty kórip otyrǵan qazaqstandyqtar qazir tek tynyshtyqty tileıdi. Men de sonyń birimin» dedi.
№31 saılaý ýchaskesine Eńbek Eri, ataqty mehanızator Kámshat Dónenbaeva daýys berýge keldi. Birazdan beri densaýlyǵy syr berip júrgen Kámshat Baıǵazyqyzyn uly Asqar men nemeresi Altynaı alyp keldi.
Kámshat apa: «Búgin elimizde erekshe kún dep aıtýǵa bolady. Memleketimizdiń basshysyn tańdap, saılap alamyz. Elimiz damýy jáne balalardyń bolashaǵy dańǵyl, elde tynyshtyq bolýy úshin de memleket basshysyn saılaýǵa jurtshylyq asa jaýapkershilikpen qaraýy tıis. Men densaýlyǵyma baılanysty tústen keıin keldim, sonyń ózinde saılaý ýchaskesine aǵylǵan adamda esep joq. Shúkirshilik, bári de eldiń birliginiń arqasy» dedi.
№ 60-shy saılaý ýchaskesine daýys berýge kelgen qala turǵyndary óz tańdaýyn jasaǵannan keıin dereý ketip qalǵan joq. Pedagogıka kolledjiniń ujymy saılaýshylar úshin stýdentterdiń qolóner kórmesin jasap qoıypty. Ony qyzyqtamaǵan saılaýshylar kemde-kem. Stýdentter saılaý ýchskesiniń aýlasynda flesh-mob bıledi. Ol osy saılaý ýchaskesinde bolǵan sheteldik baıqaýshylarǵa da unapty.
TMD baıqaýshylar mıssııasynyń múshesi Lapatınskaıa Galına:Tańerteńnen beri birneshe saılaý ýchaskesine bardyq. Adamdardyń belsendiligine tańǵalǵanymyzdy jasyra almaımyz. Eshqandaı ereje buzý, kemshilik baıqalmady, barlyǵy da merekedegideı kóńildi» dedi.
Tústen keıingi saǵat 16.00 shamasynda oblystyq saılaýshylar komıssııasy oblys saılaýshylarynyń 80 paıyzdan astamy daýys bergenin málimdedi.
Názıra Járimbetova.
Derek, sýret: egemen.kz
