Kisilik — uly qasıet. Ol úırenetin óner emes, oqyp biletin ǵylym da emes. Atanyń aqylynan, ananyń aq sútinen bastaý alatyn, sırekterdiń ǵana úlesine tıetin talanttyń jemisi, súıkimdi qasıet. Sondaı sırek qasıet ıeleriniń qataryna men Syr óńirine qadiri ortaq azamat Qylyshbaı Aldabergenuly Bısenovti jatqyzar edim.
Ol qandaı qyzmette, qandaı bılik satysynda bolmasyn bılik pen parasat araqatynasyn ajyrata bildi, kreslonyń kúshine emes, óziniń isine sendi. Árkez qaı iste, qaı burylysta bolsyn, kisiligi basym turdy. Ol halyqtyń búkil áreket-qımylyn, bilim-biligin tarazy basyna salyp otyratynyn árqashan jadynda ustap, ózin sol el-halqynyń qyzmetshisimin dep sanady.
Keıbireý Qylyshbaı Aldabergenulynyń qyzmet babyndaǵy asa qatań talapshyldyǵyn tiline tıek etedi. Ol eshqashan qatań minezdi óz óktemdigin kórsetýge, kúshtep moıyndatýǵa, belden basyp bedel jınaýǵa qoldanǵan emes, iskerliktiń, rettiliktiń, jınaqtylyqtyń, aqyrynda temirdeı tártip pen sheber uıymdastyrýshylyqtyń generatory retinde paıdalanyp, ol talapty áýeli ózine, sonan soń baryp aınalasyna birdeı qoıa bildi. «Mynaý týysym, mynaý jaqynym, mynaý qımas dosym» dep alalamady. Eń bastysy, qyzmettesteriniń qabilet-qarymyn tanyp, ishki jan dúnıesin kórip, soǵan saı baǵyt-baǵdar berip, bolashaqqa baýlydy. Sol sebepti de ol qaı jerde kishilik, qaı jerde kisilik kórsetý keregin biletin kemel, qandaı ýaqytta bolmasyn el múddesine qyzmet etýge bilimi, biligi, tájirıbesi, jańashyldyǵy, eńbekqorlyǵy, qabileti jetetin, ýaqytpen birge tolysyp, qalyptasqan azamat retinde jurtyna moıyndaldy.
Onyń sol kezdegi dúnıejúzilik ǵylymı ortalyq sanalatyn Máskeýde doktorlyq dıssertasııa qorǵaýy, onyń paıdasyn baıtaq Otanynyń kórýi, qaıta qurý kezeńinde tarıhy tarmaqtalyp ketken Syr eliniń sımvoly - Qorqyt Ata atyndaǵy Qyzylorda memlekettik ýnıversıtetin birizdendirýi, Parlament minberinde kótergen baıyrqaly bastamalarynyń sharapatyn tutas ult sezinýi, ol daıyndaǵan árbir kadrdyń óńir damýynda oıyp alar óz oryny bolýy, qoǵamdyq keńeste qoǵam atynan aıtqan oılarynyń máselege dármen bola ketýi, tól ıntellıgensııamyzdyń ataýly alqasy sanalatyn Ulttyq quryltaıdaǵy aıshyqty oryny, bári-bári tulǵanyń tutas bolmysyn beınelep turǵan joq pa?..
Qylyshekeń qazir qurylysshy-ınjener, tehnıka ǵylymdarynyń doktory ǵana emes, óńir rýhanııatynyń kóshbasynda turǵan qaıratker. Ony aqyn da, tilshi-ǵalym da, tarıhshy-etnograf ta, hımık-bıolog ta, jyrshy-jyraý da, ártúrli orta lıderleri de, saıası satydaǵy memlekettik qyzmetkerler de ustaz tutady, sebebi, ol jurtqa ortaq tulǵaǵa aınala bildi. Adam úshin, azamat úshin budan asqan baqyt bar ma?
«Taǵa tuıaqty kóteredi, tuıaq tulpardy kóteredi, tulpar erdi, er eldi kóteredi» dep ardaqtymyz Sherhan Murtaza aıtqandaı, el-halqyna adal eńbek etip, kópke úlgi bolyp, «El aǵasy» deıtin bedeli bıik ataqqa laıyqty parasatpen ortamyzdy júrgen dosymyz Qylyshbaı Aldabergenuly Bısenovti búgingi óz basy úshin, otbasy úshin erekshe kúnimen quttyqtaımyz!
Nemat Kelimbetovtiń “Úmit úzgim kelmeıdi” degen hıkaıatynda kópke málim ulaǵatty ustazynan shákirti “Ustaz Siz qansha jasqa keldińiz?” dep surapty. Sonda ustazy: “Myń jasqa keldim-aý” dep jaýap qatady. Shákirtiniń “Ol qalaı?” degen suraǵyna: “Ár kezde bireýge kómek kórsetip, paıdam tıgen kezde mereıim artyp, rahattanyp, bir jasap qalamyn” degen eken. Qylyshbaı dosymyz da óńirimizdegi, elimizdegi atqarylyp jatqan qoǵamdyq tirlikterdiń bel ortasynda júrip, bilim-ǵylym salasynda da, azamattyq jolda da, aǵaıyndyq jolda da kópke qoldaýyn, qamqorlyǵyn kórsetip júrgen azamat. Biz de Qylyshbaı dosymyzǵa “myń jasa” degen tilek bildiremiz!
Ustaz Qylysh, ǵalym Qylysh, qaıratker Qylysh ulaǵatymen ósirgen urpaǵymen, Qudaı qosqan qosaǵy Gúlsim Zikirııaqyzymen birge tek jaqsy kórse deımiz. Adamzatqa Alash kerek, Alashqa Azamat kerek! Azamattardyń aǵasy, aqylshysy Qylyshbaı Aldabergenuly halqynyń, jerlesteriniń qurmetine bólene bersin!
Árip Hojbanov,
qoǵam qaıratkeri
